BI HERSWIDA, DIWANI MPYA KATA YA UTIRI

Tarehe ya kuwekwa: March 22nd, 2024

Mbinga. Msimamizi Msaidizi wa uchaguzi mdogo wa udiwani kata ya Utiri, Jimbo la Mbinga Mjini Bw. Backlay Mwarabu amemtangaza Bi. Herswida Sines Komba wa CCM kuwa mshindi wa uchaguzi mdogo wa udiwani katika kata hiyo iliyopo Halmashauri ya Mji wa Mbinga, Mkoa wa Ruvuma.

Katika uchaguzi huo uliofanyika tarehe 20 Machi, 2024, Bi. Herswida aliibuka kidedea kwa kupata kura 740 akimshinda Bw. Awadh Athuman Meza wa UMD aliyepata kura 278.

Akitangaza matokeo ya uchaguzi huo, Bw. Mwarabu alisema Ndugu Abdallah Bonifasi Ngonyani wa Chama cha Demokrasia Makini alipata kura 20.

Baada ya kutangazwa kwa matokeo hayo, Bw. Ngonyani alitoa shukrani kwa Tume ya Taifa ya Uchaguzi kwa kurartibu na kusimamia uchaguzi huo kwa kuzingatia sheria na kutoa ushirikiano mkubwa kwa wagombea tangu wakati wa uteuzi.

Pia alionyesha kuridhishwa na matokeo na kwamba atajipanga wakati mwingine ili aweze kushinda chaguzi zijazo.