HALMASHAURI YA MJI WA MBINGA YATOA MIKOPO YA SHILINGI BILIONI 1.2 KATIKA KIPINDI CHA MIAKA NANE

Tarehe ya kuwekwa: November 15th, 2023

Na Erasto George

Mbinga.  Katika kipindi cha miaka nane, Halmashauri ya Mji wa Mbinga imetoa mikopo yenye thamani ya shilingi bilioni 1.2   Kwa vijana, wanawake na watu wenye ulemavu.

Mkuu wa Idara ya Maendeleo ya Jamii Halmashauri ya Mji wa Mbinga Bi. Cecilia Mbata alisema mikopo hiyo itokanayo na fedha za asilimia 10 ya mapato ya ndani ya Halmashauri,  ilitolewa kwa vikundi 258.

“Vikundi hivi vilivyopatiwa mikopo ni kati ya vikundi 1,111 vilivyosajiliwa katika Halmashauri ya Mji wa Mbinga,” alisema Bi. Cecilia wakati wa ziara ya ukaguzi wa vikundi vya wajasiriamali hao mwiishoni mwa wiki jana.

Akizungumza kwa niaba ya wakaguzi wa vikundi hivyo, alisema kuwa lengo la ziara hiyo ni kuangalia shughuli zinazoendeshwa na vikundi hivyo.

Aliongeza kuwa ziara hiyo pia inalenga kuvikumbusha vikundi hivyo kuwa shughuli zao zinatakiwa kuwa endelevu na kurudisha marejesho yao ili vikundi vingine viweze kupata mikopo hiyo.

"Serikali inatoa mikopo ili kuvikomboa vikundi kiuchumi pia ni muhimu kufanya marejesho yao kwa wakati sahihi,''alisisitiza Bi. Cecilia.

Pia, aliwashauri wanachama wa vikundi hivyo kufanya kazi kwa bidii ili waweze kujikomboa kiuchumi.

Wakaguzi hao walitembelea vikundi 6 ambavyo ni kikundi cha  Neema yetu, Kikuza uchumi, Mapendano, Jiwezeshe pamoja na vikundi vya watu wenye ulemavu cha  Ilela na Baraka.