HALMASHAURI YA MJI WA MBINGA YATOA MIKOPO YA SHILINGI MILIONI 213 KATIKA KIPINDI CHA MWAKA MMOJA

Tarehe ya kuwekwa: November 16th, 2023

Na Erasto George

Mbinga. Katika mwaka wa fedha 2022/23, Halmashauri ya Mji wa Mbinga ilitoa mikopo ya shilingi  milioni 213 kwa vikundi vya vijana, wanawake na watu wenye ulemavu kwa lengo la kuwasaidia katika shughuli zao za ujasiriamali.

Mikopo hiyo, ambayo inatokana na asilimia 10 ya mapato ya Halmashauri, ilitolewa  kwa vikundi 33, kwa mujibu wa Mkuu wa Idara ya Maendeleo ya Jamii katika Halmashauri ya Mji wa Mbinga, Bi. Cecilia Mbata.

Bi. Cecilia aliyasema hayo mwishoni mwa wiki jana wakati wa ziara ya kukagua maendeleo ya shughuli zinazofanywa na vikundi mbalimbali viliyobahatika kuneemeka na mikopo hiyo.

Katika ziara hiyo, Bi. Cecilia aliambatana na Mratibu wa Mpango wa Kunusuru Kaya Maskini (TASAF) Bw. Gilbert Gotifrid, Mkaguzi wa Ndani Bw. Clement Jackson, Mwandishi wa Vikao Bw. Kassim Boti pamoja na maofisa wengine kutoka Idara ya Maendeleo ya Jamii.