KAMATI YA FEDHA YATEMBELEA MIRADI YA SH333 MILIONI

Tarehe ya kuwekwa: May 4th, 2024

Na Alex Nelson Malanga

Afisa Habari----Mbinga Mji

Mbinga. Kamati ya Fedha ya Halmashauri ya Mji wa Mbinga ikiongozana na  Wataalamu wa Halmashauri leo Mei 4, 2024 imetembelea miradi saba ya afya na mmoja wa elimu yenye thamani ya shilingi milioni 333.    

Miradi hiyo iliyotembelewa na kamati hiyo inayoongozwa na Mwenyekiti wa Halmashauri Mhe. Kelvin Mapunda ni zahanati za Masumuni iliyopo kata ya Masumuni (Sh27 milioni), Luwaita---kata ya Luwaita (Sh50 milioni) na Kitelea--- kata ya Kilimani (Sh50 milioni).  

Zahanati nyingine ni zile za Makatani, kata ya Kagugu (Sh26 milioni), Kagugu---kata ya Kagugu (Sh50 milioni), Njomlole---kata ya Kikolo (Sh50 milioni), Lupilo---kata ya Kitanda (Sh40 milioni) na ujenzi wa madarasa mawili katika shule ya Msingi Utiri, kata ya Utiri (Sh40 milioni).

Mhe. Mapunda alisema kati ya zahanati saba zilizotembelewa na kamati, tano ambazo ni Masumuni, Luwaita, Kagugu, Makatani na Kitelea zinatarajiwa kufunguliwa kabla ya mwezi Mei 30, 2024.

“Tumeona ni vema kabla ya tarehe 30 mwezi huu tukafungua zahanati tano ambazo ujenzi wake umekamilika na kwa hizo zilizosalia tunatamani zifunguliwe mwishoni mwa mwezi huu,” alisema Mhe. Mapunda.

Alisema haraka iwezekanavyo Halmashauri itapeleka pesa kwaajili ya umaliziaji wa ujenzi wa zahanati hizo.

Aliongeza: “Ni dhamira yetu kusogeza huduma karibu kwa wananchi. Hatutaki kuona wananchi wanatembea umbali mrefu kufuata matibabu. Lazima tuendelee kutekeleza ilani ya Chama cha Mapinduzi ili tuingie kwenye uchaguzi tukiwa vizuri zaidi."