MAAFISA UGANI WA MJI WA MBINGA WAKABIDHIWA VIFAA VYA KILIMO VITAKAVYOONGEZA TIJA KWA WAKULIMA

Tarehe ya kuwekwa: September 14th, 2023

Na Elizabeth Newa & Rahma Mwaka

Mbinga. Kilimo ni Uti wa mgongo na ikiwa ni ishara ya kuiishi kauli hiyo, Mkuu wa Wilaya ya Mbinga Mhe. Aziza Mangosongo jana Septemba 13, 2023 alikabidhi vifaa vya Kilimo kwa maafisa Ugani 27 wa kata zote  zilizopo katika Halmashauri ya mji wa Mbinga.

Vifaa hivyo vinavyotarajiwa kuongeza tija katika Kilimo ni Kipima Afya ya Udongo, Bomba za kunyunyizia viwatilifu, Kompyuta, Printa, Lamination mashine, Makoti ya mvua, Buti pamoja na Kishikwambi ambavyo vitawasaidia kufanya kazi kitaalamu na kutunza  takwimu mbalimbali.

Akizungumza wakati wa makabidhiano, Mkuu wa Wilaya alianza kwa kuwakumbusha maafisa ugani kuwa Kilimo ni uti wa mgongo kwani mahitaji mengi ikiwemo  chakula na mavazi yanatokana na Kilimo.

Mhe. Aziza aliishukuru Serikali ya awamu ya sita inayoongozwa na Mhe. Dkt. Samia Suluhu Hassan kwa kuona umuhimu wa Kilimo na kuwapatia vifaa maafisa ugani vitakavyowasaidia kutekeleza majukumu yao ya kuwahudumia wakulima.

Aliishukuru pia Wizara ya Kilimo inayoongozwa na Mhe. Hussein Bashe kwa kutekeleza agizo la kila afisa Kilimo anakuwa na chombo cha usafiri kwa ajili ya kusaidia kazi zao za kila siku na kumpatia kila mmoja  Pampu ya kunyunyizia viwatilifu, Buti za shambani na Koti la mvua.

Akizungumzia kipima udongo, alisema kifaa hicho kitasaidia kupima afya ya udongo katika mashamba ya wakulima ili kujua aina ya udongo na Virutubisho vilivyomo na mazao yanayostawi katika eneo hilo.  

Pia, Mkuu wa Wilaya aliwaagiza maafisa ugani wote kuwa vifaa hivyo vikafanye kazi na kazi ionekane.

“Wakulima wote wapate huduma  ya kupimiwa afya ya udongo katika mashamba yao na kupatiwa vyeti bila malipo yoyote kama ilivyoagizwa na  Mhe. Rais Samia,” alisema Mhe. Aziza.

Alisema kuwa anatambua uzalishaji wa kahawa, maharage na mahindi katika Halmashauri ya Mji wa Mbinga si mkubwa ikilinganishwa na Halmashauri nyingine.

 Kutokana na uhalisia huo, aliwataka maafisa ugani kwenda kusimamia uzalishaji vizuri ili kuongeza tija na kuwa na manufaa zaidi kwa wakulima.

Kwenye hafla hiyo Mkurugenzi wa Halmashauri  ya Mji wa Mbinga Bi. Amina Seif alishindwa kufika kutokana na kuwa na majukumu mengine ya kitaifa.

Kutokana na sababu hiyo, aliwakilishwa na Mkuu wa Idara ya Kilimo, Mifugo na Uvuvi wa Halmashauri ya Mji Mbinga Bw. Enock Peter Ndunguru.

Bw. Ndunguru alisema vifaa hivyo walivyopata vitasaidia kupima, kutambua na kuimarisha afya ya udongo.

Alieleza kuwa baada ya kupima udongo mkulima  atapatiwa ushauri wa kitaalamu kulingana na afya ya udongo uliopo katika shamba lake ikiwemo aina ya mbolea itakayofaa katika shamba hilo na kiasi cha mbolea kinachostahili.

Bw. Ndunguru alisema maafisa kilimo pia kupitia vifaa hivyo walivyopatiwa, watawaelekeza wakulima matumizi sahihi ya  pampu pamoja na vipimo vya dawa.

Nae Afisa kilimo  kutoka kata ya Utiri  David Kitalika alisema baada ya kupata kipima udongo wao kama maafisa Kilimo wataenda kuwashauri wakulima kitu ambacho kina uhalisia.

“Uzalishaji katika maeneo mengi ni mdogo kutokana na kukosa vifaa vya kitaalamu na kushindwa kujua ni aina gani ya mbolea inafaa,” alisema Bw. Kitalika.