Madiwani Mbinga Mji Robo ya tatu, Wampongeza na kumshukuru Mhe; Rais Daktari Samia Suluhu Hassan Kwa kuendelea Kuleta Fedha Utekekezaji Miradi ya Maendeleo

Tarehe ya kuwekwa: May 17th, 2023

Kikao cha baraza la Madiwani cha robo ya tatu Halmashauri ya Mji wa Mbinga, kimefanyika katika  Ukumbi wa Oddo Mwisho, May 16 2023. Kikao hicho kimehudhuriwa na kamati ya Usalama ya Wilaya, Waheshimiwa Madiwani, Wakuu wa idara na vitengo ,viongozi wa taasisi, Afisa Tarafa, Viongozi wa chama na viongozi wa dini, watendaji kata na wageni mbalimbali walioalikwa.

Lengo la kikao hicho ni kujadili masuala mbalimbali ya maendeleo yahusuyo Halmashauri ya Mji wa Mbinga katika nyanja mbalimbali, Moja ya mambo yaliyojadiliwa ni kupokea taarifa za utekelezaji wa shughuli za taasisi mbalimbali Kwa kipindi cha robo ya tatu ya Jan-March 2023 katika taasisi za Tanesco, Ruwasa, Mbiwasa na Tarura, Vyanzo vya mapato na matumizi yake, miradi ya boost na masuala mbalimbali ya kiutumishi.

Hata hivyo, Wajumbe wa kikao hicho walipata nafasi ya kuhoji, kutoa maoni, mapendekezo  na ushauri ili kuweka maazimio ya pamoja na mikakati ya kuinua makusanyo hususani  maeneo ambayo hayajafanya vizuri katika makusanyo na kutoa huduma muhimu kwa wananchi ili yafanyiwe marekebisho kwa faida na maslahi mapana  ya Mbinga na taifa kwa ujumla.

Aidha, Katika kikao cha baraza la Madiwani cha robo ya tatu ya Jan-March 2023 Mkurugenzi wa Halmashauri ya Mji wa Mbinga Bi. Grace S. Quintine alitumia nafasi hiyo kuishukuru Serikali ya awamu ya sita Rais wa Jamhuri ya Muungano wa Tanzania Mhe. Daktari Samia Suluhu Hassan, kwa kutoa fedha nyingi za miradi ya maendeleo ikiwepo Afya, Maji, Elimu na Miundombinu ya barabara.

Ambapo alieleza kwamba Halmashauri ya Mji wa Mbinga imepokea kiasi cha shilingi milioni 995,000,000/= kutoka Serikali kuu, Fedha hizo zimelekezwa kwenda kujenga Vyumba viwili vya madarasa na matundu matatu ya vyoo kwa baadhi ya kata na shule mpya zenye mkondo mmoja mbili za msingi katika kata ya Matarawe na mpepai ili kupunguza msongamamo katika shule za maeneo hayo. Vilevile alieleza na kubainisha mikakati, Kanuni na miongozo ya Serikali na Halmashauri katika utekelezaji wa miradi mbalimbali ya kimkakati

Naye, Mwenyekiti wa Halmashauri ya Mji wa Mbinga Mhe; Kelvin Mapunda Kwa niaba ya Madiwani alitumia nafasi hiyo kuipongeza na kuishukuru serikali sikivu na makini ya awamu ya sita chini ya Rais wa Jamhuri ya Muungano wa Tanzania Mhe.  Daktari Samia Suluhu Hassan Kwa kuendelea kutoa fedha nyingi za miradi jambo ambalo linaleta faraja Kwa wananchi kwa kusogezewa huduma muhimu karibu na maeneo yao.

Mwisho, Mkurugenzi alitoa rai kwa viongozi na wananchi kuendelea kushirikiana na wataalamu waliopo katika maeneo yao ili kuwa na dira ya pamoja inayolenga kukuza uchumi na pato la taifa, Vilevile kushiriki shughuli mbalimbali za maendeleo katika maeneo yetu kwasababu zinalenga kuboresha huduma muhimu za kijamii.

IMETOLEWA NA

OFISI YA MKURUGENZI

HALMASHAURI YA MJI WA MBINGA

MAY 17, MWAKA 2023