MBINGA MJI KUONGEZA MAPATO YA NDANI KWA ASILIMIA 40

Tarehe ya kuwekwa: March 14th, 2024

Na Alex Nelson Malanga

Afisa Habari----Mbinga TC

Mbinga. Makadirio ya makusanyo na matumizi ya mapato ya ndani ya Halmashauri ya Mji wa Mbinga kwa mwaka wa fedha ujao yameongezeka kwa asilimia 39.5.

Mkurugenzi wa Halmashauri ya Mji wa Mbinga Bi. Amina Seif alisema wiki iliyopita kuwa makadirio ya mapato ya Halmashauri yameongezeka hadi kufikia Shilingi bilioni 3.455 kwa mwaka wa fedha 2024/25.

Makadirio kwa mwaka huu wa fedha yaani 2023/24 ni Shilingi bilioni 2.476.

Alifafanua kuwa kwa mwaka ujao wa fedha kati ya shilingi bilioni 3.455 zinazotarajiwa kukusanywa, shilingi bilioni 2.542 ni mapato yasiyolindwa na Shilingi milioni 913.495 ni mapato lindwa.

Bi. Amina alisema Halmashauri ya Mji wa Mbinga ina kila sababu ya kufikia lengo kutokana na jitihada zao za kubuni vyanzo vipya vya mapato.

Kwa mwaka wa sasa wa fedha (2023/24) Halmashauri ya Mji wa Mbinga imekuja na vyanzo vipya vya mapato ambavyo ni maegesho ya magari, mabango ya matangazo, kodi ya majengo na kodi ya ardhi.

“Ili kufikia malengo tuliyojiwekea, tutaendelea na jitihada zetu za kubuni vyanzo vipya vya mapato,” alisisitiza Bi. Amina.