MBINGA MJI KUPOKEA MWENGE JUNI 13

Tarehe ya kuwekwa: May 11th, 2024

Na Alex Nelson Malanga

Afisa Habari---Mbinga Mji

Mbinga.  Mwenge wa Uhuru unatarajiwa kutua katika Halmashauri ya Mji wa Mbinga, Mkoa wa Ruvuma Juni 13 mwaka huu na kushuhudiwa na watu zaidi ya 2,000.

Mratibu msaidizi wa Mwenge kwa Halmashauri ya Mji wa Mbinga Bw. Condrad Adam Kawonga alisema: “tumetoa mialiko kwa wadau kutoka makundi mbalimbali.”

Alisema Mbinga Mji itaupokea Mwenge kutoka Halmashauri ya Wilaya ya Nyasa kabla ya kuukabidhi kwa Manispaa ya Songea siku inayofuata yaani Juni 14.

Kwa Mbinga Mji, Mwenge utapokelewa katika kijiji cha Mhekela, kata ya Kilimani, kabla ya  kukabidhiwa kwa Manispaa ya Songea, mtaa wa  Likuyufusi Juni 14.

Kimkoa, mkoa wa Ruvuma unatarajia kupokea Mwenge wa Uhuru Juni 8 kutoka Mkoa wa Mtwara na kuukimbiza katika Halmashauri zake zote nane kabla ya kuukabidhi kwa Mkoa wa Njombe Juni 16, 2024.

Mwenge huo ambao kauli mbiu yake kwa mwaka huu ni ‘Tunza mazingira na shiriki uchaguzi wa serikali za mitaa kwa ujenzi wa Taifa endelevu’, utapokelewa katika kijiji cha Sauti Moja kilichopo katika Halmashauri ya Wilaya ya Tunduru.

Kwa mwaka huu, Mwenge wa Uhuru ulizinduliwa Aprili 2, 2024 mkoani Kilimanjaro na Waziri Mkuu wa Jamhuri ya Muungano wa Tanzania Mhe. Kassim Majaliwa.

 Kwa mara ya kwanza nchini Mwenge wa Uhuru uliwashwa mwaka 1961 na kupandishwa juu ya kilele cha Mlima Kilimanjaro na Luteni Kanali Alexander Nyirenda.

Siku hiyo, Hayati Baba wa Taifa, Mwalimu Julius Kambarage Nyerere alisisitiza umuhimu wa kuijenga Tanzania yenye umoja, mshikamano na upendo miongoni mwa wananchi.