MHE. ALEX ANDOYA ACHAGULIWA KUWA MAKAMU MWENYEKITI WA HALMASHAURI YA MJI WA MBINGA

Tarehe ya kuwekwa: September 18th, 2023

Na Alex Nelson Malanga

Afisa Habari----MTC

Mbinga.   Ni rasmi sasa Mhe. Alex Andoya, diwani wa kata ya Kilimani, ndiye Makamu Mwenyekiti wa Halmashauri ya Mji wa Mbinga (MTC).

Kama kuna mtu ambaye Ijumaa ya Septemba 15, 2023, ilikuwa ni siku tamu kwake kuliko mtu mwingine yeyote, basi si mwingine bali Mhe. Andoya kwani alipita bila kupingwa katika uchaguzi uliofanyika katika ukumbi wa mikutano wa  Oddo Mwisho uliopo katika Halmashauri ya Mji wa Mbinga.

 Hii ina maana kubwa sana kwake kwani ni ishara ya kukubalika na kuaminiwa kwa kiasi kikubwa na madiwani wenzake.

Kukubalika kwake kunathibitishwa na yeye kuwa mgombea pekee wa nafasi hiyo, huku madiwani wengine wakiamini Mhe. Andoya anatosha na ndio maana alipita kwa kura zote za ndio kutoka kwa wajumbe.  

Mhe. Andoya aliyechaguliwa katika mkutano wa Baraza la Madiwani anachukua nafasi ya Mhe. David Mapunda aliyemaliza muda wake wa mwaka mmoja.    

Madiwani pia walimchagua Mwenyekiti wa Halmashauri, Mhe. Kelvin Mapunda, kuwa mwenyekiti wa kamati ya Fedha, huku Mhe. Batson Mpogolo, ambaye ni diwani wa kata ya Kagugu, akichaguliwa kuwa mwenyekiti wa kamati ya Huduma za Uchumi.

Mhe. Amanyisye Ngonepo, ambaye ni diwani wa kata ya Betherehemu,  alichaguliwa kuwa mwenyekiti wa Mipango Miji, wakati Mhe. Andoya akivishwa kofia ya pili ya uenyekiti wa kamati ya Kudhibiti Ukimwi.

Kwa upande mwingine, Mhe. Winfrid Komba, diwani wa kata ya Mbambi, alichaguliwa kuwa mwenyekiti wa kamati ya Maadili.

Mkutano wa uchaguzi uliongozwa kwa umahiri mkubwa na Mwenyekiti wa Halmashauri ya Mji wa Mbinga huku akisaidiwa kwa ukaribu na ustadi mkubwa na Mkurugenzi wa Halmashauri hiyo Bi. Amina Seif.          

Akizungumza baada ya uchaguzi Mhe. Mapunda alimtaka makamu Mwenyekiti kufanya kazi kwa weledi mkubwa ili kuipeleka mbele Halmashauri ya Mji wa Mbinga.

“Utaniwakilisha maeneo mbalimbali. Naamini utakuwa mtulivu na mwenye busara ya hali ya juu,” alisema Mhe. Mwenyekiti.

Aliongeza: “Wakuu wa Idara na Vitengo wanakutegemea kwa ushauri wa kina ili mambo yaende.”

Pia alimtaka Mhe. Andoya kusimama kidete katika kumshauri mwenyekiti.

“Ikibidi mimi na wewe tuwe tunaongozana kuelekea kwa Mkurugenzi kuzungumzia mambo muhimu kuhusu mustakali wa Halmashauri yetu,” alisema Mhe. Mapunda.

Kwa upande wake Mkurugenzi Bi. Amina aliwamwamwagia sifa kede kede viongozi waliochaguliwa akiwa na imani kuwa uwezo wao utakuwa chachu ya maendeleo ya Halmashauri.

“Nina imani Makamu Mwenyekiti na viongozi wengine waliochaguliwa kuongoza kamati mbalimbali watakuwa na msaada mkubwa kwa Halmashauri yetu,” alisema Bi. Amina.

Mhe. Andoya, kwa upande wake, alisema yeye na viongozi wenzake watahakikisha wanatimiza majukumu yao kwa kuwapa ushirikiano mkurugenzi, madiwani na wakuu wa idara.

“Nawahakikishia kuwa nipo pamoja nanyi nyote. Nitakuwa daraja la kumshauri Mwenyekiti ili kuhakikisha Halmashauri yetu inasonga mbele,” alisisitiza Mhe. Andoya.