MHE MAKORI ATUMA SALAMU KWA WEZI

Tarehe ya kuwekwa: July 31st, 2024

Na Alex Nelson Malanga

Afisa Habari----Mji Mbinga

Mbinga. Mkuu wa Wilaya ya Mbinga Mhe. Kisare Matiku Makori siku ya Jumatano (Julai 31) alitoa onyo kali kwa wananchi ambao wanajihusisha na vitendo vya uwizi wa mali za watu.   

Akizungumza katika kata ya Matarawe iliyopo katika Halmashauri ya Mji wa Mbinga Mhe. Makori alisema katika siku za hivi karibuni kumeibuka wimbi la uwizi wa betri za gari, TV na magodoro.

“Badala ya kujishughulisha na shughuli halali za kiuchumi, baadhi ya watu wamekuwa wakijihusisha na vitendo vya uwizi, hii haikubaliki hata kidogo,” alikemea Mhe. Makori wakati wa mkutano na wananchi wa Matarawe.

Aliongeza kwa kuonya na kutoa matumaini kwa wananchi: “Vyombo vya ulinzi na usalama vipo imara na tutadhibiti vitendo viovu ili wananchi waishi kwa amani.”

Mhe. Makori alisema tayari kiongozi wa genge la wezi na wapambe wake wamekamatwa kufuatia oparesheni ya jeshi la polisi na kwamba kama kuna mtu aliibiwa aende kituo cha polisi kutambua vitu vyake.

Akionya kuwa serikali ina mkono mrefu, aliwataka wananchi kuacha mara moja vitendo vya uwizi na badala yake wawekeze  nguvu kubwa zaidi katika shughuli za kilimo.

“Tumieni fursa ya Mbinga kuwa eneo ambalo karibu kila zao lina stawi vizuri,” alishauri huku akitaja baadhi ya mazao kama kahawa, parachichi, mahindi na maharage.