MJI MBINGA YAPONGEZWA KWA KUPATA HATI SAFI

Tarehe ya kuwekwa: July 13th, 2024

Na Alex Nelson Malanga

Afisa Habari---Mji Mbinga

Mbinga. Halmashauri ya Mji wa Mbinga iliyopo mkoani Ruvuma imepongezwa kwa kupata hati safi katika mwaka wa fedha 2022/23, huku ikipewa angalizo la kutobweteka.

Pongezi hizo zilitolewa Jumamosi (Julai 13) na viongozi mbalimbali wa serikali wakati wa kikao cha kujadili hoja na mapendekezo ya Mdhibiti na Mkaguzi Mkuu wa Hesabu za Serikali (CAG) kwa hesabu za Halmashauri ya Mji Mbinga za mwaka wa fedha 2022/23.

Akitoa heko hizo, Katibu Tawala wa Mkoa wa Ruvuma Bi. Rehema Madenge alisema uongozi wa Halmashauri ya Mji wa Mbinga una kila sababu ya kupongezwa.

 “Mnastahili kupewa heko. Lakini hamtakiwi kubweteka na badala yake mnapaswa kukaza buti ili Halmashauri ya Mji wa Mbinga iendelee kupata hati safi,” Bi. Rehema alitoa angalizo.

Katibu Tawala huyo wa Mkoa kwa kiasi fulani alionesha kuridhishwa na Mji Mbinga linapokuja suala la ushughulikiaji wa hoja na mapendekezo ya CAG pamoja na maagizo ya Kamati ya Bunge ya Hesabu za Serikali za Mitaa (LAAC).

Kwa mujibu wa taarifa ya CAG, kati ya hoja na mapendekezo 26 yaliyotelewa na CAG kwa mwaka wa fedha ulioishia June 30, 2023, yaliyofanyiwa kazi na kufungwa ni mapendekezo 11.

Taarifa inaendelea kueleza kuwa hoja na mapendekezo 15 yapo katika hatua mbalimbali za utekelezaji.

“Hoja zote zinazostahili kufungwa zitafutiwe majibu na vielelezo kabla au ifikapo Septemba 30 mwaka huu,” aliagiza Bi. Rehema wakati wa kikao kilichofanyika katika ukumbi wa mikutano wa Oddo Mwisho uliopo Mji Mbinga.

Aliongeza: “Utendaji wenu siku zote uzingatie kanuni, sheria na utaratibu ili kuzuia hoja zisijitokeze tena.”

Naye Mkuu wa Wilaya ya Mbinga Mhe. Kisare Matiku Makori aliungana na Katibu Tawala wa Mkoa kuipongeza Halmashauri ya Mji Mbinga kwa kupata hati safi.

“Hongereni sana kwa kupata hati safi. Tafsiri ya kupata hati safi ni kwamba tunawajibika ipasavyo katika kusimamia rasilimali zetu,” alisema Mhe. Makori.

Kwa upande wake Mwenyekiti wa Halmashauri ya Mji wa Mbinga Mhe. Kelvin Mapunda aliahidi kushirikiana na wataalamu kuzuia hoja zisizokuwa za lazima na pia kufanyia kazi mapendekezo ya CAG.