MKURUGENZI WA MJI WA MBINGA AWAPA FURSA WAKULIMA WA TANGAWIZI MBINGA MJINI

Tarehe ya kuwekwa: November 3rd, 2017

Akizungumza mbele ya wawakilishi wa Vikundi vya wakulima Ofisini kwake, Mkurugenzi wa Mji wa Mbinga Ndg. Robert Kadaso Mageni amewaeleza wakulima wa Mji wa Mbinga kuwa Kilimo cha Tangawizi ni kilimo mbadala ambacho kinaweza kuwakomboa kiuchumi. Wakulima hao wakiongozwa na Afisa Kilimo wa Mji Ndg. Maganga Ngahy wanatarajia kuondoka alfajiri ya siku ya tarehe 4/11/2017 kuelekea Wilayani Madaba ikiwa ni ziara ya siku mbili kwaajili ya kujifunza namna ya ulimaji bora wa zao la Tangawizi na ufugaji wa Kuku wa Asili.

Ndg. Mageni amesema kuwa wakati umefika kwa Wanambinga kuacha kutegemea zao la Mahindi pekee kama zao la chakula na biashara bali kwa msimu wa mahindi unapopita basi wajishughulishe na kilimo mbadala cha Tangawizi na Ufugaji wa Kuku. Pia aliongeza kuwa Halmashauri yake ina mipango mizuri ya kuwainua wakulima wake kupitia fursa mbalimbali kama vile ufugaji wa Kuku ambapo amewaahidi kuwaletea Mashine bora za kutotoa Vifaranga vya kuku. Kupitia Mashine hizo wakulima watanufaika na ufugaji bora na wa kisasa wa Kuku na hivyo kuwaongezea kipato.

Akiongea kwaniaba ya wanavikundi, Mkulima Charles Komba wa kikundi cha TUPENDANE amemshukuru Mkurugenzi wa Mji wa Mbinga Ndg. Robert K. Mageni kwa jitihada zake za kuwakomboa wakulima na pia kwa kuonyesha nia ya dhati ya kuwasaidia vifaa na mikopo kwaajili ya kuendesha kilimo cha kisasa.

“..Sisi kama wakulima tunakushukuru sana Mkurugenzi wetu wa Mji kwa kutuonyesha kutujali wakulima wako na tunakuahidi elimu tutakayoipata huko Madaba tutakuja kuitumia vizuri ili tuweze fikia malengo tuliyokusudia..” Alisema Mkulima huyo.

Afisa kilimo wa Mji Ndg. Ngahy Maganga amesema kuwa idara yake itahakikisha inashirikiana na wakulima bega kwa bega katika jitihada za kukuza kilimo cha Tangawizi. Wanufaika wakubwa wa kilimo hicho ni wananchi wa Kata za Kikolo, Mepai, Kitanda na Kihungu ambapo uchumi wa eneo unatarajia kukua kwa kasi. Jumla ya Vikundi nane vinatarajia kujifunza kilimo bora cha Tangawizi na ufugaji bora wa Kuku wa Asili.