MKUU WA MKOA WA RUVUMA APONGEZA UANDAAJI WA MITI KATIKA KITALU CHA PANDA MITI KIBIASHARA MBINGA MJINI

Tarehe ya kuwekwa: October 19th, 2017

Katika ziara yake Wilayani Mbinga leo tarehe 18 Oktoba 2017, Mhe. Mkuu wa Mkoa wa Ruvuma Ndg. Binilith Mahenge alitembelea na kukagua kitalu cha miti kilichopo Kihaha Mbinga Mjini. Akizungumza baada ya kukagua kitalu hicho alisema kuwa amefurahishwa na amempongeza Mkurugenzi wa Mji wa Mbinga Ndg. Robert K. Mageni kwa usimamizi mzuri wa uandaaji wa kitalu hicho cha Panda Miti Kibiashara na alisisitiza kuwa kwakuwa uandaaji umekuwa mzuri na kitalu kimependeza basi hata itakapofikia hatua ya upandaji wa miti hiyo usimamizi unatakiwa kuwa mzuri pia ili miti iliyokusudiwa kupandwa ipandwe yote kikamilifu.

Mradi huu wa panda miti kibiashara ulianzishwa kwa ufadhili wa mfuko wa Misitu Tanzania na ‘Private Forestry Program’ (PFP) au Panda Miti Kibiashara. PFP ni mradi ulioanzishwa kwa ufadhili wa Nchi ya Finland kwa kupitia Wizara ya Maliasili na Utalii.

Katika Halmashauri ya Mji wa Mbinga Mradi wa Panda Miti Kibiashara umewezesha uzalishaji wa miche ya miti milioni moja (1,000,000) ambapo miche hiyo itapandwa katika hifadhi ya Milima Lihumbe uliopo Mpakani mwa Mbangamao na Mpepai. Miti hiyo itapandwa kupitia Jumuiya za Wapanda Miti yaani ‘Tree Griowers Association’ (TGA’s) zitakazotumia block za Lihumbe kupanda miti hiyo. Jumla ya miche 1,000,000 imeandaliwa kwaajili hiyo.

Aidha Mfuko wa Misitu Tanzania (TaFF) umefadhili /umewezesha uandaaji wa miche 200,000 (miambili elfu) itakayopandwa katika Mashamba ya Halmashauri ya Mji yaliyopo Mbambi na Ugano. Hii ni awamu ya kwanza ya utekelezaji wa Mradi kwani jumla ya Tshs. 38,000,000/= zitatolewa na Mfuko Misitu Tanzania ambapo kwa awamu ya kwanza tayari kiasi cha Tshs. 15,200,000/= kimetumika katika awamu hii ya kwanza ya uandaaji wa miche katika kitalu.