MKUU WA WILAYA YA MBINGA AITAKA HALMASHAURI YA MJI WA MBINGA KUBUNI VYANZO VIPYA VYA MAPATO

Tarehe ya kuwekwa: February 9th, 2024

Na Alex Nelson Malanga

Afisa Habari…Mbinga TC

Mbinga. Mkuu wa Wilaya ya Mbinga ameutaka uongozi wa Halmashauri ya Mji wa Mbinga kubuni vyanzo vipya vya mapato ili kutunisha mfuko wa Halmashauri hiyo.

Wito huo ulitolewa siku ya Alhamisi, Februari 8, 2024 wakati wa Mkutano wa Baraza la Madiwani---Robo ya Pili (Oktoba-Disemba) uliofanyika katika Ukumbi wa Mikutano wa Oddo Mwisho uliopo katika Halmashauri ya Mji wa Mbinga.

“Tubuni vyanzo vipya vya mapato na vilivyopo tuvilinde na tuvisimamie vizuri ili tuongeze mapato yetu ya ndani,” aliagiza Mhe. Aziza.

Aliongeza: “Mapato ni roho yetu, bila mapato Halmashauri haiwezi kufanya kazi.”

Kwa mwaka wa Fedha uliopita (2022/23) Halmashauri ya Mji wa Mbinga ilikusanya Shilingi bilioni 2.128 kama mapato ya ndani.

Kati ya kiasi hicho Shilingi bilioni 1.564 ni mapato yasiyolindwa (yanakusanywa na Halmashauri ya Mji wa Mbinga, makao makuu) na Shilingi milioni 564 (bilioni 0.564) ni mapato lindwa (yanakusanywa na vituo mbalimbali vya Halmashauri).

Ili kuongeza ukusanyaji wa mapato, pia Mkuu wa Wilaya aliutaka uongozi wa Halmashauri kuziba mianya ya upigaji pesa za serikali.

“Kuna baadhi ya watumishi wanachukua pesa mbichi…wanatia mfukoni badala ya kuingiza kwenye mfumo, hii haikubaliki,” alisema Bi. Aziza.

Wakizungumza baada ya Mkuu wa Wilaya kutoa maagizo, Mwenyeki wa Halmashauri Mhe. Kelvin Mapunda na Mkurugenzi wa Halmashauri Bi. Amina Seif walisema watajitahidi kadri wawezavyo kuhakikisha wanaongeza ukusanyaji wa mapato.

Mhe. Mapunda alisema: "lazima tuongeze kasi ya ukusanyaji mapato ili kufikia na hata kuvuka lengo la ukusanyaji wa mapato."

Kwa upande wake Bi. Amina, alisema kwa mwaka huu wa fedha (2023/24), Halmashauri inatarajia kukusanya Shilingi bilioni 2.476 kama mapato ya ndani.

Kati ya kiasi hicho, Shilingi bilioni 1.88 ni mapato yasiyolindwa na kiasi kinachobakia ni mapato lindwa.