MKUU WA WILAYA YA MBINGA APIGIA CHEPUO ZAO LA PARACHICHI

Tarehe ya kuwekwa: February 7th, 2024

Na Alex Nelson Malanga

Afisa Habari---Mbinga TC

Mbinga. Mkuu wa Wilaya ya Mbinga Mhe. Aziza Mangosongo amewataka wakulima wa Wilaya hiyo kulima mazao mengine ya biashara kwenye maeneo yao badala ya kutegemea Kahawa peke yake.

Akizungumza ofisini kwake siku ya Jumanne, Februari 6, 2024 wakati wa mkutano na wakulima pamoja na wadau wa zao la parachichi, Mhe. Aziza alisema kwa wakulima wa kahawa kulima mazao mchanganyiko itawawezesha kupanua wigo wa mapato yao.

“Pindi bei ya kahawa inaposhuka, zao mbadala linaweza kuwa msaada kwako na hivyo kukufanya usitetereke kiuchumi,” alisema Mhe. Aziza huku akipigia chepuo zao la parachichi.

Aliongeza: “Mbali ya kuwa chanzo cha kipato kwa wakulima, parachichi ni rafiki wa mazingira.”

Mkutano huo wa wakulima na wadau wa parachichi pia ulihudhuria na Kaimu Mkurugenzi wa Halmashauri ya Mji wa Mbinga Bw. Enock Ndunguru na Mkurugenzi Mtendaji wa Halmashauri ya Wilaya ya Mbinga Bw. Juma Haji Juma.