MWENGE WATEMBELEA MIRADI 8 YA SH2.1 BILIONI

Tarehe ya kuwekwa: June 13th, 2024

Na Alex Nelson Malanga

Afisa Habari---Mbinga Mji

Mbinga. Mwenge wa Uhuru mwaka 2024 umetembelea miradi nane yenye thamani ya shilingi bilioni 2.1 katika Halmashauri ya Mji wa Mbinga, imebainishwa.

Kati ya miradi hiyo iliyotembelewa Juni 13, 2024, miwili ilifunguliwa, mingine miwili ilikaguliwa na mmoja uliwekewa jiwe la msingi.

Miradi iliyofunguliwa, pamoja na gharama kwenye mabano ni, ule wa maji uliopo kijiji cha Utiri, kata ya Utiri (Sh421.423 milioni) pamoja na ule wa madarasa mawili ya shule ya Msingi Myangayanga(Sh48 milioni).

Kwa upande wa miradi iliyokaguliwa ni ule wa Kiwanda cha kukoboa kahawa---MCCCO (Sh725.273 milioni) pamoja na ule wa shamba la mbegu bora za miti lililopo kata ya Utiri (Sh27.2 milioni).

Ukizungumzia mradi uliowekewa jiwe la msingi, si mwingine bali, ni ule wa Hospitali ya Halmashauri ya Mji wa Mbinga unaohusisha ujenzi wa jengo la wagonjwa wa nje (OPD), upasuaji na maabara (Sh900 milioni).  

Pia timu ya Mwenge wa Uhuru ilikagua shughuli za lishe katika kata ya Muyangayanga, iligawa vyandarua kwa wazee, mama wajawazito, mama wenye watoto chini ya miaka mitano na waathirika wa Ukimwi, pamoja na kuzindua klabu ya wapinga rushwa iliyopo shule ya sekondari Mbinga.

Mwenge wa Uhuru uliwasili Mbinga Mji leo majira ya saa 2.37 asubuhi na aliyeupokea ni Mkuu wa Wilaya hiyo Mhe. Kisare Matiku Makori.  

Mhe. Makori alikabidhiwa Mwenge huo na Mkuu wa Wilaya ya Nyasa Mhe. Peres Magiri  mara baada ya kuwasili katika kijiji cha Mhekela kilichopo kata ya Kilimani.

Katika Halmashauri ya Mji wa Mbinga, Mwenge utakimbizwa umbali wa kilometa 140 na  timu ya watu sita kwa ngazi ya Taifa, ikiongozwa na Bw. Godfrey Eliakimu Mnzava, kabla ya kukabidhiwa kwa Manispaa ya Songea Juni 14, 2024.

Kwa mwaka huu, Mwenge wa Uhuru ulizinduliwa Aprili 2, 2024 mkoani Kilimanjaro na Waziri Mkuu wa Jamhuri ya Muungano wa Tanzania Mhe. Kassim Majaliwa.