RC RUVUMA AONGOZA ZOEZI LA KUAGA MIILI 6 YA AJALI YA GARI

Tarehe ya kuwekwa: January 3rd, 2025

Na Erasto George

Mbinga. Mkuu wa mkoa wa Ruvuma Kanali Ahmed Abbas Ahmed amewaongoza waombolezaji kuaga miili ya marehemu waliopoteza maisha katika ajali ya gari lililogonga gema na kuwaka moto eneo la kijiji cha chunya  wilaya ya  Mbinga tarehe 28.12.2024.

Zoezi hilo la kuaga miili hiyo limefanyika katika uwanja wa michezo wa CCM Mbinga, mapema leo terehe 03.01. 2025.

Akizungumza katika tukio hilo Mkuu wa mkoa wa Ruvuma Kanali Ahmed Abbas Ahmed amewaomba waombolezaji waweze kupokea salamu za pole kutoka kwa Rais wa Jamhuri ya Muungano wa Tanzania Dkt. Samia suluhu Hassan, Makamu wa Rais Dkt. Philip Isdor Mpango pamoja na Waziri mkuu Kassim Majaliwa.

Aidha, Mkuu wa mkoa wa Ruvuma amewapa pole wafiwa wote walipototeza ndugu zao katika ajali hiyo.

“Tutumie msiba huu kutafakali maneno na maandiko yaliyotolewa na viongozi wetu wa dini, na kujindaa kwa kusali na kufanya toba” alisema Mkuu wa mkoa wa Ruvuma.

Nae Mkuu wa Wilaya ya Mbinga Mhe. Kisare Matiku Makori  ametoa pole kwa wafiwa wote ambao wamepoteza ndugu zao katika wakati ambao haukutarajiwa na mazingira ambayo yanayoumiza sana.

ametoa shukurani zake kwa ofisi ya mkuu wa mkoa wa Ruvuma kwa  jinsi walivyoweza kuratibu jambo hili kwa maelekezo yote na kufika siku ya leo kuwaaga wapendwa wetu. 

 “Naweza kuhisi maumivu waliyonayo kwasababu wengine wameondokewa na  baba, mama, watoto na wangine wake naomba neno la Mungu likawape faraja” alisema Mhe. Makori.

Kwa upande wa Mwenyekiti wa Halmashauri ya Mji wa Mbinga Mhe. Kelvin Mapunda amewapa pole wafiwa wote nakuwaombea kwa Mungu awape nguvu katika kipindi hiki kigumu wanachopitia cha kuwapoteza wapendwa wao.