UVUNAJI WA SAMAKI WAPAA KWA ASILIMIA 114.3 KATIKA HALMASHAURI YA MJI WA MBINGA

Tarehe ya kuwekwa: November 21st, 2023

Na Elizabeth Newa & Rahma Mwaka

Mbinga. Uvunaji wa samaki katika Halmashauri ya Mji wa Mbinga uliongezeka kwa asilimia 114.3 kwa mwaka wa fedha 2022/2023 ikilinganishwa na mwaka 2021/22.

Afisa uvuvi wa Halmashauri ya Mji wa Mbinga Bw. Musa Mwasenga alisema siku ya Jumanne, Novemba 21, 2023, kuwa katika kipindi tajwa uvunaji wa samaki uliongezeka kutoka tani 0.7 hadi kufikia tani 1.5.

 “Ongezeko hilo limetokana na wafugaji wa samaki kuendelea kupata elimu kuhusu njia bora za ufugaji wa samaki kwa lengo la kuwafanya wakuze kipato chao,” alisema Bw. Mwasenga.

Aliongeza: “ Tumekuwa tukitumia Redio na semina mbalimbali kutoa elimu kwa wafugaji kuhusu ufugaji bora wa samaki. Pia tumekuwa tukimfikia mfugaji mmoja mmoja. Ofisi zetu ziko wazi kwaajili ya ushauri.”

Bw. Mwasenga alisema katika Halmashauri hiyo ambayo hutegemea samaki kutoka kwenye mabwawa pekee, kuna wafugaji wa samaki 448.

 Kati ya hao, alielezea,  205 wapo kwenye vikundi na 243 ni mtu mmoja mmoja.

Bwana Mwasenga alisema mabwawa ya kufugia samaki yaliongezeka kutoka 529 mwaka 2021/22 hadi kufikia 594 mwaka 2022/23.