UZALISHAJI WA ASALI HALMASHAURI YA MJI WA MBINGA WAPAA KWA ASILIMIA 5.1

Tarehe ya kuwekwa: November 8th, 2023

Na Erasto George

Mbinga. Uvunaji wa asali katika Halmashauri ya Mji wa Mbinga uliongezeka kwa asilimia 5.1 mwaka 2022/23 ikilinganishwa na mwaka 2021/22.

Akizungumza Novemba 8, 2023 kwa niaba ya Mkurugenzi wa Halmashauri ya Mji wa Mbinga Bi. Amina Seif, Afisa Nyuki wa Halmashauri hiyo Bw. Gilbert Gotifrid alisema kuwa katika kipindi tajwa tani za asali zilizovunwa ziliongezeka kutoka 3.9 hadi 4.1.

Ongezeko hilo, alisema Bw. Gotifrid, limechagizwa na kuongezeka kwa mwamko wa wananchi katika shughuli za ufugaji wa nyuki.

 “Mwamko umekuwa ukiongezeka siku hadi siku ingawa bado si wakuridhisha sana ikilinganishwa na ukubwa wa maeneo ya ufugaji tuliyonayo,” alisisitiza.

Bw. Gotifrid alisema mwaka 2022/23 wafugaji nyuki ambao ni watu binafsi na taasisi waliongezeka kufikia 84 ikilinganishwa na 42 za mwaka wa nyuma yake.

Kwa upande mwingine, vikundi vilivyokuwa vinajihusisha na ufugaji wa nyuki viliongezeka kutoka 32 hadi kufikia 40.

Bw. Gotifrid alisema bado fursa za ufugaji nyuki hazijatumiwa ipasavyo.

“Kati ya hekta 900 zilizopo katika milima ya Lipembe ambazo zimetengwa kwaajili ya shughuli za ufugaji wa nyuki, ni kama asilimia 1.1 tuu zinatumika kwa shughuli hiyo,” alisema.  

Bw. Gotifrid alieleza kwamba ili kutumia vizuri fursa zilizopo kitengo chake kimekuwa kikitoa elimu kuhusu ufugaji wa nyuki kupitia vipeperushi pamoja na redio zilizopo katika Halmashauri.

Kwanini asali ni muhimu?

 Bw. Gotifrid alisema kuwa asali inawasaidia wafugaji wa nyuki kujipatia pesa na kuongeza kipato Chao.

Upande wa afya, alisema, asali inafanya uwiano mzuri wa sukari mwilini pia inawasaidia watu wenye vidonda vya tumbo.