WAANDIKISHAJI WA DAFTARI LA WAPIGA KURA WAPATIWA MAFUNZO

Tarehe ya kuwekwa: October 8th, 2024

Mbinga. Waandikishaji wa daftari la orodha ya wapiga kura Halmashauri ya Mji wa Mbinga wamepatiwa  mafunzo yenye lengo la kuwajengea uwezo wa kutekeleza majukumu yao kuelekea zoezi la Uandikishaji  litakaloanza Oktoba 11 hadi 20, 2024.

Jumla ya washiriki 302 wameapa na kupata mafunzo hayo yaliofanyika katika ukumbi wa Jimbo Katoliki la Mbinga.

Afisa Uchaguzi wa Halmashauri ya Mbinga Mji Wilbroad Ngongi amesema kuwa kuteuliwa kwa washiriki hao anaamini kuwa watatekeleza majukumu yao ipasavyo ya kuandikisha wapiga kura wote ambao wana sifa ya kuandikishwa.

"Tumewateua , tunawaamini , ni waadilifu na hawapo katika dhamana ya chama chochote cha siasa, hivyo kwa kuteuliwa kwao tunaamini watatekeleza majukumu yao ipasavyo” Amesema Bw. Ngongi.

Aidha ametoa wito kwa watu wote walioteuliwa kwenda kufanya kazi kwa uaminifu na umakini wa hali ya juu kwa sababu ni zoezi la msingi kuelekea Uchaguzi wa viongozi wa Serikali za mitaa kwa 2024.

Kwa upande mwingine, Bw. Ngongi amewaomba wananchi wote wenye sifa ya kujiandikisha wajiandikishe kushiriki uchaguzi katika vituo vyote vilivyoandaliwa katika vitongoji na kata.

"Niwaombe wananchi wote wenye sifa , wajitokeze kwa wingi kujiandikisha katika vituo vilivyoandaliwa kwani usipojiandikisha hautoweza kumpigia kura kiongozi yoyote yule" Amesema  Bw. Ngongi.