WAHUDUMU AFYA NGAZI YA JAMII WAPEWE KIPAUMBELE

Tarehe ya kuwekwa: May 23rd, 2024

Na Alex Nelson Malanga

Afisa Habari---Mbinga Mji

Mbinga. Mkuu wa Wilaya ya Mbinga Mhe. Kisare Matiku Makori amesema wahudumu wa afya ngazi ya jamii ni nguzo muhimu katika utekelezaji wa afua za lishe na hivyo wanapaswa kupewa kipaumbele linapokuja suala la ajira.

Mhe. Makori jana Mei 22, 2024 aliitaka Halmashauri ya Mji wa Mbinga kuwapa kipaumbele wahudumu hao linapokuja suala la ajira za muda mfano uendeshaji wa kampeni na programu mbalimbali za afya.

Sanjari na hilo, aliitaka Halmashauri hiyo kujenga utamaduni wa kuwaandikia wahudumu wa afya ngazi ya jamii barua za utambuzi ili ziongeze uzito wa wasifu wao na hivyo kuwaweka katika nafasi nzuri zaidi ya kuingia kwenye ajira rasmi pindi nafasi zinapotangazwa.

 “Wahudumu wa afya ngazi ya jamii ni nguzo muhimu katika utoaji wa elimu ya afua za lishe kwani wao ndio wapo karibu zaidi na wananchi,” alisema Mhe. Makori wakati wa kikao cha taarifa ya tathimini ya utekelezaji wa mkataba wa lishe robo ya tatu ya mwaka 2023/24.

Miongoni mwa majukumu yanayofanywa na wahudumu wa afya ngazi ya jamii, ambao huchaguliwa katika ngazi ya kijiji/mtaa kufanya kazi katika maeneo yao husika, ni kutembelea kaya zenye wajawazito ili kuwapatia elimu ya lishe.

Pia, wahudumu hao hutembelea kaya zenye watoto chini ya miaka mitano ili kufuatilia maendeleo ya ukuaji wao na kuwapa wazazi elimu ya unasihi wa lishe na ulishaji wa watoto wadogo na wachanga.

Mganga Mkuu wa Halmashauri ya Mji wa Mbinga Dkt. Kung’e Nyamuryekung’e alisema kuwa wakati wa zoezi la chanjo mbalimbali huwa wanawakumbuka watoa huduma ngazi ya jamii kwa kuwapatia posho.

“Tunataka watu wazingatie afua za lishe ili tujenge jamii yenye afya bora na ndio maana tumekuwa tukiwapatia motisha wahudumu wa afya ngazi ya jamii ili waendelee kutoa elimu kwa wananchi,” alisema Dkt. Nyamuryekung’e.

Afisa Lishe wa Halmashauri ya Mji wa Mbinga Bi. Gloria Maya aliahidi kuendelea kutoa elimu kwa umma kuhusu masuala ya urutubishaji wa unga wa mahindi na vyakula vingine kama vile mafuta, unga wa ngano na chumvi.