BARAZA LA MADIWANI LAIDHINISHA TAARIFA YA HESABU ZA MWAKA WA FEDHA UNAOISHIA JUNI 30, 2023

Tarehe ya kuwekwa: August 30th, 2023

Na Alex Nelson Malanga

Afisa Habari----MTC

Mbinga. Baraza la Madiwani leo Agosti  30, 2023 limepitia na kuidhinisha taarifa ya hesabu za mwisho za Halmashauri ya Mji wa Mbinga (MTC) za mwaka wa fedha unaoishia Juni 30, 2023.

Kikao cha baraza la madiwani kiliongozwa na mwenyekiti wa Halmashauri ya Mji wa Mbinga Mh. Kelvin Mapunda.

"Tuwaamini wataalamu wetu, wamefanya kazi nzuri," Mh. Mapunda aliliambia baraza.

Taarifa zilizopitishwa ni zile za mizania ya hesabu, ufanisi wa hesabu na mtiririko wa fedha.

Taarifa nyingine ni zile za mabadiliko ya rasilimali za Halmashauri na za ulinganifu wa bajeti na halisi.

Aliyewasilisha taarifa hizo kwaajili ya kupitiwa na kupitishwa ni Mkuu wa Kitengo cha Fedha na Uhasibu wa Halmashauri ya Mji wa Mbinga CPA Erasto Ketocho.

"Baada ya kuidhinisha, hesabu hizo ziko tayari kuwasilishwa kwa Mdhibiti na Mkaguzi Mkuu wa Hesabu za Serikali siku ya Alhamis, Agosti 31, 2023," alisema Bw. Ketocho.

Kaimu Katibu Tawala wa Wilaya ya Mbinga Bw. Karim Mzee aliwamwagia sifa madiwani wa Halmashauri ya Mji wa Mbinga kwa kazi nzuri wanayofanya.

"Madiwani mnafanya kazi nzuri . Mnatutambulisha vema wilaya ya Mbinga ndani na nje ya mipaka yetu," alisema Bw. Mzee.