BEI YA UMILIKISHWAJI ARDHI YAPUNGUA KWA ASILIMIA 43

Tarehe ya kuwekwa: October 13th, 2023

Na Rahma Mwaka, Elizabeth Newa & Erasto George.

Mbinga. Maafisa Ardhi wa Wilaya ya Mbinga wamewataka wananchi kuchangamkia fursa ya punguzo la asilimia 42.9 ya bei ya umilikishwaji wa ardhi baada ya Rais wa Jamhuri ya Muungano wa Tanzania Mhe. Dkt. Samia Suluhu Hassan kutoa ofa hiyo.

 Afisa Ardhi Mteule wa Halmashauri ya Mji wa Mbinga France Kaganda, alieleza kuwa  kuanzia Julai 1, 2023, gharama zimepungua kutoka Shilingi 163,000  hadi Shilingi 93,000 kwa kiwanja chenye mita za mraba 600.

Bw. Kaganda alikuwa anaongea Oktoba 12, 2023 wakati wa kilele cha kampeni maalum ya siku nne ya kutoa elimu ya masuala yahusuyo usimamizi wa sheria, kanuni na taratibu za uendelezaji wa ardhi, kusikiliza na kutatua migogoro ya ardhi katika Wilaya ya Mbinga.  

"Tunawataka  wananchi wote wenye viwanja ambavyo vimepimwa na vina sifa ya kuandaliwa hati kujitokeza ili kupata nyaraka za hati miliki," alisema  Bw. Kaganda.

Aliongeza kuwa mwananchi akilipa kodi ya ardhi na kupeleka vithibitisho vyote katika idara ya Ardhi, ataandaliwa na kupatiwa hati yake ndani ya siku 14.

Mkuu wa Wilaya ya Mbinga Mhe. Aziza Mangosongo aliwataka maafisa Ardhi kutoa hati miliki kwa wakati ili watu waanze shughuli za ujenzi kwa wale wanaohitaji kujenga.

Aliwaasa wananchi kufuata ushauri wa wataalamu wa ardhi ili kuepuka athari mbalimbali zinazoweza kujitokeza baadae ikiwa ni pamoja na kubomolewa nyumba au kupitiwa na mafuriko.

"Watu wengi wamekuwa wakipigana na kuumizana kutokana na migogoro ya ardhi, ninakiagiza kitengo cha Ardhi kuwa wasuluhishi zaidi kuliko kuwa chanzo cha migogoro," aliagiza Mhe. Aziza

Mkurugenzi wa Halmashauri ya Mji wa Mbinga Bi. Amina Seif alisema kuwaona wataalamu wa ardhi na kupata hati miliki pamoja na ushauri itasaidia kupunguza au kuondoa migogoro ya ardhi.  

“Zoezi hili la kutoa elimu, kusikiliza na kutatua kero za ardhi litakuwa endelevu,” alisema Bi. Amina huku akiomba ushirikiano kwa mkuu wa Wilaya pindi anapopata nafasi.

Katibu Tawala wa Wilaya ya Mbinga Bi. Pendo Daniel alisema kwa kusikiliza kero kutoka kwa wananchi, itasaidia kupunguza migogoro kwa kiasi kikubwa.

“Nataka zoezi hili liwe endelevu,” aliagiza Bi. Pendo.

Mkuu wa idara ya Ardhi wa Halmashauri ya Mji wa Mbinga Bw. John Rikanga alisema idara yake kwa sasa itaongeza nguvu katika kuzuia migogoro ya ardhi ili kupunguza au kuondoa athari za migogoro hiyo.

“Tuzuie migogoro na si kusubiri itokee ndipo tuanze kuitatua,” alisema Bw. Rikanga.

 Alisema migogoro mingi ya ardhi inatokana na mikataba holela ya kuuziana au kukodishiana eneo.

Kwa muktadha huo, alisema kwa wilaya nzima ya Mbinga,  idara itaandaa mkataba wa aina moja wa kuuziana na kukodishiana eneo ili kuwasaidia wananchi kuepuka migogoro ya ardhi.

Katika muda wa siku nne, wananchi 99 walijitokeza kupata elimu na kutoa malalamiko yao ambayo yalitatuliwa mbele ya Mkuu wa Wilaya.