BODI YA NYAMA YATOA ELIMU YA UNENEPESHAJI WA MIFUGO

Tarehe ya kuwekwa: October 6th, 2023

Na Erasto George

Mbinga. Maafisa wa Bodi ya nyama kutoka  kanda ya nyanda za juu  kusini wametoa elimu kwa wafugaji wa Halmashauri ya Mji wa Mbinga juu ya unenepeshaji wa mifugo hususani ng’ombe na nguruwe.

Elimu hiyo ilitolewa katika semina iliyofanyika Septemba 30, 2023 katika Halmashauri ya Mji wa Mbinga.

Afisa wa bodi ya nyama Kanda ya Nyanda za Juu  Kusini Bw. Nelson William alisema  unenepeshaji wa mifugo ni kitendo cha kumuweka mnyama katika mazingira mazuri kwa muda wa miezi 3 na kumpatia chakula bora.

Bw. William alieleza sababu za kufanya unenepeshaji wa mifugo ikiwemo kupata nyama bora na salama na kupata soko la ndani na nje ya nchi kwa urahisi.

Aliwataka wafugaji kujisajili katika bodi ya nyama ili waweze kupatiwa elimu ya unenepeshaji wa mifugo yao pia kutafutiwa masoko ya ndani na nje ya nchi.

 “Wafugaji wa Halmashauri ya mji wa Mbinga  kateni bima za mifugo ili ziwasaidie pale mifugo yenu inaposhambuliwa na magonjwa au majanga ya kuungua moto,” alisisitiza Bw. William.

Afisa mwingine wa bodi ya nyama Kanda ya Nyanda za Juu  Kusini Bi. Asifiwe Mjujulu alisema lengo kubwa la bodi hiyo ni kutambua shughuli za wadau na kuwawezesha kushiriki katika kuendeleza tasnia ya nyama kuanzia uzalishaji, usindikaji na biashara ya mifugo.

Bi. Asifiwe alieleza kuwa bodi ya nyama Tanzania ni chombo kilichoanzishwa na sheria ya nyama na 10 ya mwaka 2006 chini ya kifungu na 9[1].