ELIMU YA JINSIA KUPUNGUZA VITENDO VYA UKATILI.

Tarehe ya kuwekwa: October 17th, 2023

Na Elizabeth Newa,  Erasto George & Rahma Mwaka

Mbinga.  Mkuu wa idara ya Maendeleo ya Jamii wa Halmashauri ya Mji wa Mbinga Bi. Cecilia Mbata ameeleza kwamba wamekuwa wakitoa elimu katika shule za msingi, sekondari na vyuo ili kupunguza vitendo vya ukatili dhidi ya wanawake na watoto katika Halmashauri hiyo.

Oktoba 17, 2023 Bi. Cecilia alisema wamekuwa wakiwafikia  wazazi, walezi na ndugu wa karibu wa familia kwa kuwa vitendo vya ukatili vinaanzia nyumbani.

Aliongeza kuwa elimu hiyo wamekuwa wakiitoa kwa kushirikiana na  idara ya Ustawi wa Jamii, Dawati la Jinsia (Polisi) na mashirika mbalimbali yanayopinga vitendo hivyo.

"Elimu hiyo inalenga kuvunja ukimya pindi vitendo vya ukatili vinapotokea, ili viweze kuripotiwa na hatua za kisheria zichukuliwe,"alisema Bi.Cecilia.

Mkuu wa kitengo cha huduma za Ustawi wa Jamii katika  Halmashauri ya Mji wa Mbinga Bw. Paul Mbawala alisema wamekuwa wakizitumia siku 16 za kupinga ukatili wa kijinsia kutoa elimu katika jamii.

Alisema wamekuwa wakipita katika taasisi mbalimbali zikiwemo shule, magereza, hospitali na hata kumfikia  mtu mmoja mmoja ili kuwaelimisha kuhusu vitendo hivyo visivyofaa.

Alizitaja sababu za vitendo vya ukatili na unyanyasaji wa kijinsia katika jamii kuwa   ni uelewa mdogo kuhusu sheria na haki za binadamu, imani za kishirikina, ulevi, umasikini kwa wanawake na  jamii kukosa elimu ya usawa wa kijinsia.

"Wananchi wajitahidi  kuripoti matukio ya ukatili yanapotokea katika jamii ili kusaidia kukomesha vitendo hivyo," alisema Bw. Mbawala.

Mkazi wa Halmashauri ya Mji wa Mbinga Mzee Kaka Yao alisema kinapotokea kitendo cha kikatili dhidi ya mtu yeyote katika eneo analoishi ataripoti  katika vyombo vya habari na usalama ili muathirika asaidiwe.

Mkazi mwingine wa Halmashauri ya Mji wa Mbinga Martin Komba alisema  akiona mtu anafanyiwa ukatili ataripoti  kwa kiongozi wa serikali wa eneo husika au  kituo cha polisi ili hatua stahiki zichukuliwe.