GEUZA WAIBUKA KIDEDEA TAMASHA LA WAMATENGO

Tarehe ya kuwekwa: November 1st, 2023

Na Erasto George, Rahma Mwaka & Elizabeth Newa

Mbinga.  Kikundi cha ngoma za asili (Mganda) cha Geuza kutoka kijiji cha Agati kilichopo Halmashauri ya Mji wa Mbinga kimeibuka mshindi wa kwanza katika mashindano ya ngoma za asili yaliyofanyika katika tamasha la wamatengo.

Kikundi hicho kilitumbuiza katika tamasha hilo  lililofanyika Jumatatu ya Oktoba 30, 2023 katika kijiji cha Mtama, kata ya Utiri ambapo waliweza kujikusanyia alama 91.7 kutoka kwa jopo la majaji wanne na kujinyakulia kitita cha shilingi 100,000.

Kikundi cha mganda kutoka kijiji cha Litumbandyosi walishika nafasi ya pili wakiwa na alama 84 na kujichukulia shilingi 70,000 huku washindi wa tatu wakiwa ni Mhambo kutoka kata ya Nyoni waliopata alama 81 na kuondoka na shilingi 50,000.

Washindi wa kwanza na wa pili walioonekana kuwa nadhifu kutokana na mavazi safi (kaptula nyeupe, mashati meupe, mikanda myeusi, viatu vyeusi na soksi nyeupe) waliyokuwa wamevaa.

Kwa hakika walikuwa nadhifu, hakika walicheza kwa madoido, kwa hakika walistahili ushindi.

Katika mashindano hayo majaji walitumia vigezo vitano kuwachagua washindi.

 Vigezo vilivyozingatiwa na alama kwenye mabano ni wimbo kulingana na tukio (25%), madoido katika uchezaji (25%), matumizi ya muda (20%), matumizi ya zana (20%) na unadhifu wa mavazi (10%).  

Washiriki wengine wa mashindano hayo ni Mganda kutoka Kijiji cha Mtama na Lipumba na ngoma ya kioda kutoka Kata ya Masumuni, na Namswea ambavyo vilizawadiwa shilingi 20,000 kwa kila kikundi.

Mbali na zawadi hizo mbunge wa Mbinga Mjini Mhe. Jonas Mbunda, na Mhe. Benaya Kapinga wa Mbinga Vijijini walitoa shilingi 30,000 kwa kila kikundi cha ngoma kilichoshiriki  katika tamasha hilo.

Pesa hizo ziliwasilishwa kwa niaba, na aliyekuwa mgeni rasmi katika tamasha hilo Waziri wa Utamaduni, Sanaa na Michezo Mhe. Dkt Damas Ndumbaro.