HALMASHAURI YA MJI MBINGA KUTOA SHILINGI MILIONI 26 KUKAMILISHA UJENZI WA SHULE YA LUSEWA

Tarehe ya kuwekwa: October 6th, 2023

Na Elizabeth Newa, Erasto George & Rahma Mwaka

Mbinga.  Mwenyekiti wa Halmashauri ya Mji wa Mbinga Mhe. Kelvin Mapunda amewaahidi wananchi wa mtaa wa Lusewa, kata ya Luhuwiko kupata Shilingi milioni 26 mwezi huu kwa ajili ya kukamilisha ujenzi wa shule.

Mhe. Mapunda alitoa ahadi hiyo Oktoba 1, 2023  wakati wa maadhimisho ya siku ya wazee duniani yaliyofanyika katika viwanja vya ofisi ya Kata ya Luhuwiko.

Ahadi hiyo ni ishara ya kuunga mkono jitihada za wananchi wa mtaa wa Lusewa za ujenzi wa shule kwa nguvu zao wenyewe kwa kushirikiana na Diwani wao Mhe. David Mapunda.  

"Kwa kutambua jitihada zenu na kuunga mkono jitihada za serikali ninatamka hapa mtapata Shilingi milioni 26 mwezi huu na hakikisheni mnaitumia vizuri fedha hiyo kukamilisha ujenzi ili Januari 2024 watoto waanze masomo." alisema Mhe. Mapunda

Aidha, Mhe. Mapunda aliishukuru serikali ya awamu ya sita inayoongozwa na Mhe. Rais Dkt. Samia Suluhu Hassan kwa kuwaletea miradi mingi katika Wilaya ya Mbinga.

"Tunaishukuru serikali kwa kutupatia vituo vya afya, madarasa ya shule za msingi na sekondari, umeme pamoja na maji." alisema Mhe. Mapunda

Alimshukuru Mkuu wa Mkoa wa Ruvuma Mhe. Laban Thomas kwa kusimamia Mkoa wa Ruvuma na kuhakikisha shughuli zote za maendeleo zinafanyika kwa wakati na ufanisi mkubwa.

"Ninamshukuru  Mkuu wa Wilaya ya Mbinga Mhe. Aziza Mangosongo kwa kuwa mstari wa mbele katika kutoa maelekezo na ushauri ili kuhakikisha miradi yote inakamilika kwa wakati," alisema Mhe. Mapunda.