HALMASHAURI YA MJI WA MBINGA YAFIKIA ASILIMIA 65.3 YA LENGO LA UANDIKISHAJI WANAFUNZI WA DARASA LA KWANZA

Tarehe ya kuwekwa: January 9th, 2024

Na Alex Nelson Malanga

Afisa Habari---Mbinga TC

Mbinga.  Ikiwa imesalia miezi mitatu kufikia ukomo wa usajili wa wanafunzi wapya wa darasa la kwanza kwa mwaka wa masomo wa 2024, tayari Halmashauri ya Mji wa Mbinga imefikia asilimia 65.3 ya lengo la uandikishaji.

Akizungumza siku ya Jumatatu (Januari 8, 2024), Mkuu wa Wilaya ya Mbinga Mhe. Aziza Mangosongo alisema wanafunzi wapya ambao wameandikishwa tangu zoezi hilo lianze Oktoba mwaka jana, ni 2,994.  

Kati yao, 1,498 ni wasichana na 1,496 wavulana, alifafanua Mh. Aziza wakati wa ziara yake ya kutembelea shule za Sekondari Mbinga, na Dr. Philip I. Mpango iliyopo Kata ya Matarawe pamoja na Shule ya Msingi Matengo (Kata ya Matarawe).

Maoteo ya Halmashauri hiyo yenye shule za msingi za serikali 83 ni kuandikisha wanafunzi 4,588 ifikapo Machi 31, 2024.

“Naamini tutafikia lengo,” alisema Mhe. Aziza, huku akiwataka wanafunzi kusoma kwa bidii ili wawe msaada kwa Taifa hapo baadaye,”.

              Picha kubwa

Mpaka kufikia asubuhi ya Jumatatu (Januari 8), Mhe. Aziza alisema jumla ya wanafunzi walioandikishwa kuanza darasa la kwanza kwa Wilaya nzima ya Mbinga yenye shule za Msingi za Serikali 251 ni 8,345.

Tafsiri yake ni kuwa kama Halmashauri ya Mji wa Mbinga imeandikisha wanafunzi 2,994, Halmashauri ya Wilaya ya Mbinga imeandikisha wanafunzi 5,351.

Aidha, kwa upande wa elimu ya awali, wanafunzi wapya walioandikishwa katika Wilaya ya Mbinga ni 7,844 kwa mwaka wa masomo 2024.

Kati yao, 2,588 ni kutoka Halmashauri ya Mji wa Mbinga na 5,256 Halmashauri ya Wilaya ya Mbinga.

Katika ziara yake, Mkuu wa Wilaya aliambatana na Mwenyekiti wa Halmashauri ya Mji wa Mbinga, Mhe. Kelvin Mapunda, Mkurugenzi Bi. Amina Seif na wakuu wa Idara na Vitengo.