Halmashauri ya Mji wa Mbinga yawataka waendesha bodaboda kuishi kwa upendo na kufuata sheria

Tarehe ya kuwekwa: August 29th, 2023

Na Alex Nelson Malanga

Afisa Habari----MTC

Mbinga. Halmashauri ya Mji wa Mbinga (MTC) imewataka madereva bodaboda kufanya kazi kwa ushirikiano na upendo huku wakifuata kanuni, taratibu na sheria za nchi.

Wito huo ulitolewa Agosti 25, 2023 wakati wa mkutano kati ya viongozi wa Halmashauri hiyo na viongozi wa madereva bodaboda uliofanyika halmashaurini hapo.

Mkutano huo uliitishwa ili kuja na namna bora ya kuwawezesha madereva bodaboda walio kwenye maeneo yasio sahihi kwenda kwenye vijiwe vilivyotengwa kwaajili ya huduma yao.

Mwenyekiti wa Halmashauri ya Mji wa Mbinga Mh. Kelvin Mapunda alisema alichogundua ni kukosekana kwa upendo baina ya madereva bodaboda.

Alisema hayo kutokana na baadhi ya madereva hao kusema wanakataliwa kwenye vijiwe vya bodaboda vya mlango wa kutokea na kuingilia stendi, Dapoli na Andoya.

Wanaotakiwa kuhamia vijiwe hivyo mpaka ifikapo Septemba 1, 2023, ni wale wa vijiwe vya  Block A jengo la chini katikati, na Block B jengo la juu katikati.

"Inatakiwa muende vijiwe vya jirani  kupisha maeneo hayo kwaajili ya maegesho ya magari na kupita abiria," alisema mh. Mapunda.

Aliongeza: "Shida ni kwamba hamna ushirikiano. Mnapaswa kupendana. Mnapaswa kushirikiana."

Aliwataka waishi kama ndugu kwani kila mtu anatafuta ridhiki.  

Ipo hoja iliyoibuliwa na baadhi ya madereva bodaboda juu ya ugumu wa wao kuhama kutokana na kuzoea kwenye maeneo yao ya sasa.

Akijibu hoja hiyo, Mh. Mapunda alisema: "Hoja haina mashiko.  Lazima muwe tayari kukubali mabadiliko. Tusiishi kwa mazoea."

Mkurugenzi wa Halmashauri ya Mji wa Mbinga, Bi Amina Seif, aliwataka madereva bodaboda kutovunja sheria.

Alisema serikali inaongozwa kwa sheria na taratibu na hivyo ni muhimu kuheshimu mamlaka.

" Mnapaswa kupendana na kuoneane huruma katika kazi ," Bi. Amina aliwaasa madereva bodaboda.

Diwani wa Kata ya Mbinga Mjini B Mh. Sultan Andoya  alisema kuondolewa kwa madereva bodaboda katika maeneo tajwa haimaniishi serikali haiwapendi.

"Tunaangalia maslahi mapana ya Taifa....Kitu kinachokuumiza leo, kina faida kwa wanao kesho," alisema Mh. Andoya.

Mwenyekiti wa bodaboda wilaya ya Mbinga Kefase Kamage pia aliwataka madereva bodaboda kutambua kuwa nchi inaongozwa kwa sheria.

"Ni kweli tunatafuta ridhiki lakini lazima tufuate taratibu na sheria za nchi," alisema Kefase.