HRNS TANZANIA YAIPA MBINGA MJI MICHE YA MITI 50,000

Tarehe ya kuwekwa: February 16th, 2024

Na Alex Nelson Malanga

Afisa Habari---Mbinga TC

Mbinga. Katika harakati ya kukabiliana na mabadiliko ya tabia nchi, HRNS Tanzania imeipatia Halmashauri ya Mji wa Mbinga miche ya miti 50,000 itakayopandwa katika maeneo mbalimbali ya Halmashauri hiyo.

Wiki mbili zilizopita, Mratibu  wa Mradi ---HRNS Bw. Godfrey Wilgod alisema miti hiyo itapandwa kwenye vyanzo vya maji,  maeneo yaliyoharibika ili kuyaboresha, pamoja na maeneo yanayozunguka shule na taasisi mbalimbali.

HRNS, shirika lisilokuwa la kiserikali linalotekeleza miradi yake katika mikoa mitano ya Ruvuma, Songwe, Mbeya, Kilimanjaro na Arusha, limejikita katika, pamoja na mambo mengine, kutoa elimu ya kujikabili na mabadiliko ya tabia nchi kupitia upandaji wa miti.

“Kwa kuanzia tutatoa miti 50,000. Lengo letu kubwa ni kuhakikisha tunaboresha mazingira ili kukabiliana na mabadiliko ya tabia nchi,” alisema Bw. Wilgod wakati wa uzinduzi wa kampeni ya upandaji miti shuleni iliyofanyika  katika shule ya Msingi Mkwaya iliyopo katika kata ya Kilimani.

Alisisitiza kuwa HRNS itaendelea kutoa mafunzo ya uhamasishaji juu ya namna gani wananchi wanaweza kutunza mazingira siyo tuu kwa kupanda miti bali kwa kufanya shughuli nyingine mbalimbali.

Makamu Mwenyekiti wa Halmashauri ya Mji wa Mbinga Mhe. Alex Andoya aliwashukuru HRNS kwa jitihada zao za kusaidia Halmashauri kutunza mazingira na hivyo kukabiliana na mabadiliko ya tabia nchi.

“Nawapongeza HRNS kwa kuona umuhimu wa kupanda miti,” alisema Mhe. Andoya, ambaye pia ni diwani wa Kata ya Kilimani.

Kaimu Mkurugenzi wa Halmashauri ya Mji wa Mbinga Dkt. Kung’e Nyamuryekung’e alisema msaada wa HRNS una maana kubwa sana katika harakati za kupambana na mabadiliko ya tabia nchi.

“Sasa ni wakati muafaka kwa mashirika mengine kuiga mfano wa HRNS,” alisema Dkt. Nyamuryekung’e.