KAMATI YA LISHE YATAKIWA KUSHIRIKIANA NA IDARA MTAMBUKA KATIKA USIMAMIZI WA SHUGHULI ZA LISHE

Tarehe ya kuwekwa: October 29th, 2023

Na Erasto George & Rahma Mwaka

Mbinga. Kaimu Mkurugenzi wa Halmaushauri ya Mji wa Mbinga Dkt. Kung’e Nyamuryekung’e ameitaka kamati ya Lishe ya Halmashauri hiyo  kushirikiana na idara mtambuka katika usimamizi wa shughuli mbalimbali za lishe katika jamii.

Dkt. Nyamuryekung’e alitoa wito huo katika kikao cha kamati ya Lishe ya Halmashauri hiyo kilichofanyika Oktoba 26, 2023 katika ukumbi wa Halmashauri ya Mji Mbinga kujadili taarifa ya utekelezaji wa shughuli za lishe robo ya kwanza 2023/24.

Alisema idara mtambuka kama Mipango, Utumishi, Kilimo, Maendeleo ya Jamii, Elimu na Viwanda na Biashara, zinapaswa kutambua kuwa ni jukumu lao kwa kushirikiana na idara ya huduma za Afya,ustawi wa jamii na Lishe, kuhakikisha  wananchi wanapata lishe bora.

“Lishe ndio kila kitu kwenye mwili wa binadamu. Tusiache kutengeneza kompozisheni ya usimamizi wa shughuli za masuala ya lishe zitakazo jumuisha wataalamu kutoka idara mtambuka ,” alisisitiza Dkt. Nyamuryekung’e.

Afisa lishe wa Halmashauri ya Mji Mbinga Gloria Maya aliiomba idara ya elimu kupita kwenye shule kuhamasisha haja ya kuwa na bustani za mbogamboga, klabu za lishe na kuhakikisha wanafunzi wanakula vizuri.

Aidha, Bi. Gloria aliwaomba idara ya Viwanda kusaidia kufunga mashine za kuongeza virutubisho kwenye unga wa mahindi na kuhamasisha wawekezaji kuongeza viinilishe ili kuwe na idadi kubwa ya mashine zinazoweza kuongeza viinilishe.

“Pia tumeongea na mdau wa SANKU  ili atusaidie kutoa elimu kwa jamii kuhusu umuhimu wa kutumia unga wenye viinilishe,’’alisema Gloria

SANKU ni mtoa huduma katika programu ya kuchanganya virutubishi kwenye unga wa mahindi.

Afisa lishe mwingine wa Halmashauri ya Mji wa Mbinga, Bw. Martin Kwimba, ndiye aliyewasilisha taarifa ya utekelezaji wa shughuli za lishe robo ya kwanza na kusoma maazimio ya tathimini ya  kikao cha lishe cha wilaya kilichofanyika Oktoba 19, 2023.

Bw. Kwimba alisema katika kikao cha lishe ngazi ya wilaya  kulikuwa na maazimio kadhaa yaliyofikiwa ikiwemo shule zote kuwa na klabu za lishe na kuhakikisha utekelezaji wa siku ya Afya na Lishe ya kila mtaa/kijiji.

Maazimio mengine ya kamati  ya Lishe ya Wilaya, Bw. Kwimba aliongeza, ni pamoja na kuhakikisha kunakuwepo usimamizi mzuri wa chakula kinachochangiwa na wazazi shuleni.