Kamati ya Ulinzi na Usalama Wilaya yafanya ziara Magereza ya Mbinga na Mkwaya.

Tarehe ya kuwekwa: January 10th, 2025

Kamati ya Ulinzi na Usalama Wilaya ya Mbinga imefanya ziara ndani ya Gereza la mahabusu Mbinga na Gereza la kilimo Mkwaya kwa lengo la kujionea utekelezaji wa maelekezo ya Rais wa Jamhuri ya Muungano wa Tanzania Dkt. Samia Suluhu Hassan juu ya Matumizi ya Nishati Safi sambamba na kusikiliza kero na changamoto.

Akizungumza wakati wa Ziara hiyo Mkuu wa Wilaya ya Mbinga Mhe. Kisare Matiku Makori amefurahishwa na hatua zinazochukuliwa na Uongozi wa Magereza hayo kwa kutekeleza maelekezo ya Serikali kuhusu Matumizi ya Nishati safi.

Mhe. Kisare amewapongeza viongozi wa Jeshi la magereza hayo Kwa kutoa huduma za Afya kupitia zahanati za Magereza ambazo zinatoa Huduma hadi kwa wananchi wa vijiji jirani.

Aliongeza kwa kusema kuwa  ni nia ya  Serikali ya awamu ya sita katika kuboresha huduma za afya pamoja na utawala bora kupitia madawati ya huduma za msaada wa Kisheria yaliyopo Halmashauri zote Nchini.

Aidha Kaimu Mkurugenzi Halmashauri ya Mji wa Mbinga  Dkt. Kung'e Nyamurye Kung'e ameahidi ushirikiano katika utekelezaji na uboreshaji wa huduma za afya kwenye zahanati za Magereza hayo.

Ziara hiyo imehudhuriwa na Wajumbe wa Kamati ya Usalama Wilaya ya Mbinga, Afisa maendeleo ya Jamii pamoja Afisa kutoka Dawati la Huduma za Msaada wa Kisheria.