KATA YA MASUMUNI YAIBUKA MSHINDI MASHINDANO YA USAFI MJI WA MBINGA

Tarehe ya kuwekwa: September 11th, 2023

Na Alex Nelson Malanga

Afisa Habari-----MTC

Mbinga.  Wakazi wa Kata ya Masumuni katika Halmashauri ya Mji wa Mbinga (MTC) wana kila sababu ya kutabasamu baada ya kuibuka washindi wa mashindano ya usafi katika Halmashauri ya Mji wa Mbinga kwa kuzishinda kata nyingine saba.

Kata hiyo ilitangazwa mshindi jana Septemba 10, 2023 na Mkuu wa Wilaya ya Mbinga Mhe. Aziza Mangosongo wakati wa kilele cha kampeni ya usafi ijulikanayo kama Mangosongo Oparesheni Safisha Mji: Mbinga ing’ae.

Kata hiyo ya Masumuni ilikabidhiwa fedha taslimu Shilingi 100,000, na mbuzi mweupe ikiwa ni ishara ya usafi.

Mshindi wa pili na watatu ni kata ya Matarawe na Ruhuwiko, kwa mtiririko huo.

Wakati Matarawe wakipata Shilingi 100,000 kama zawadi, Ruhuwiko walipata Shilingi 50,000.

Kata ya mwisho kwa usafi na ambayo usafi wake hauridhishi ni Mbambi ambayo ilipewa hati ya onyo huku Mkuu wa Wilaya akiwataka watendaji wa Kata na Mitaa wabadilike.

Aliitaka Kata hiyo kurudia usafi kuanzia leo Septemba 11, 2023 hadi Jumapili Septemba 17, 2023.

Katika ngazi ya Taifa, kampeni ya usafi ilianzishwa na viongozi wa kitaifa wakiongozwa na Mhe. Rais wa Jamhuri ya Muungano wa Tanzania, Dkt. Samia Suluhu Hassan, baada ya kuona hali ya usafi katika baadhi ya maeneo si ya kuridhisha.

Viongozi hao waliamuru usafi kufanyika kila Jumamosi ya mwisho wa mwezi.

“Mheshimiwa Rais amekuwa akituhimiza kila mara kuhakikisha maeneo yetu ni masafi. Sisi kama Mbinga tumeamua kufanya kwa vitendo,”

Kampeni hii iliyotamatishwa jana itakuwa ikifanywa kila baada ya miezi mitatu.

Tafsiri yake ni kwamba itazinduliwa tena mwezi wa kumi na mbili.

Akizungumza kabla ya kupata dharura na kuondoka, Mkurugenzi wa Halmashauri ya Mji wa Mbinga Bi. Amina Seif alisema ni vema jamii ikatambua kuwa uchafu wa mazingira ni sababu kuu ya maradhi duniani kwote.

“Kinachotakiwa ni kila mmoja wetu kama mwananchi kuhakikisha kuwa anasafisha mazingira yanayomzunguka na kuelimisha wale ambao hawajui umuhimu huo,” alisema Bi. Amina.

Viongozi wengine waliohudhuria bonanza la jana ni Katibu Tawala wa Wilaya ya Mbinga Bi. Pendo Daniel, madiwani wa kata mbalimbali na wakuu wa vitengo kutoka ofisi ya Mkuu wa Wilaya na Halmashauri ya Mji wa Mbinga.