KILELE CHA SIKU YA WAZEE DUNIANI KUFANYIKA KATA YA LUHUWIKO

Tarehe ya kuwekwa: September 29th, 2023

Na Erasto George

Mbinga. Kamati ya maandalizi ya maadhimisho ya siku ya wazee  duniani ya Halmashauri ya Mji wa Mbinga imepitisha kata ya Luhuwiko kuwa mwenyeji wa maadhimisho hayo yanayotarajiwa kufanyika Jumapili, Oktoba 1, 2023.

Kamati hiyo ilikutana wiki iliyopita katika kikao cha pili kilicholenga kupitia mikakati mbalimbali,  ikiwemo kuridhia kufanya maadhimisho hayo katika kata ya Luhuwiko, mtaa wa Masasi.

Mgeni rasmi katika Maadhimisho hayo yenye kauli mbiu ‘Uthabiti wa wazee kwenye dunia yenye mabadiliko’ anatarajiwa kuwa Mkuu wa Wilaya ya Mbinga Mhe. Aziza Mangosongo.

Katibu wa kamati hiyo Bw. Paul Mbawala ambaye ni mkuu wa huduma za Ustawi wa jamii wa Halmashauri ya Mji wa Mbinga alisema maadhimisho hayo yanatarajiwa kutanguliwa na kongamano litakalofanyika Jumamosi, Septemba 30, 2023.  

Katika kongamano hilo, wadau watajadili pamoja na mambo mengine, changamoto ambazo wazee wanakumbana nazo, mmomonyoko wa maadili na kupata shuhuda za vitendo vya kikatili dhidi ya wazee.

Kongamano hilo linatarajiwa kuhudhuriwa na wazee wenyewe pamoja na makundi mbalimbali ikiwemo vijana.