KILIMO NI MBOLEA

Tarehe ya kuwekwa: July 25th, 2024

Na Alex Nelson Malanga

Afisa Habari----Mji Mbinga

Mbinga. Serikali imewasihi wakulima wa Wilaya ya Mbinga kuzingatia matumizi sahihi ya mbolea kwa kufuata ushauri wa wataalamu ili kuongeza uzalishaji.

Wito huo ulitolewa Jumanne (Julai 23) na Naibu Waziri wa Nishati Mhe. Judith Kapinga ambaye alikuwa mgeni rasmi katika uzinduzi wa kampeni ya ‘Kilimo ni Mbolea’ uliofanyika katika Halmashauri ya Mji wa Mbinga, Mkoa wa Ruvuma.

“Tuache kilimo cha mazoea, tuzingatie kanuni bora za kilimo ikiwemo matumizi sahihi ya mbolea ili tunufaike na kilimo chetu,” alishauri Mhe. Judith.

Aliongeza:  “Kilimo ni ajira, kilimo ni biashara na zaidi kilimo ni mbolea. Tuongeze mavuno kwa matumizi sahihi ya mbolea,”

Mhe. Judith alisema uzalishaji wenye tija ni chachu ya kuongeza kipato kwa mkulima mmoja mmoja na pato la Taifa kwa ujumla.

Kwa mujibu wa taarifa kutoka wazara ya Kilimo, mwaka jana sekta ya kilimo iliajiri asilimia 65.6 ya nguvu kazi ya Taifa na kuchangia zaidi ya asilimia 26.5 kwenye pato la Taifa.

Pia, sekta hiyo ilichangia asilimia 65 ya malighafi za viwanda na asilimia 100 ya upatikanaji wa chakula.