KIPAUMBELE, UNGA ULIOONGEZWA VIRUTUBISHI

Tarehe ya kuwekwa: April 25th, 2024

Na Alex Nelson Malanga

Afisa Habari---Mbinga Mji

Mbinga. Kaimu Mkurugenzi wa Halmashauri ya Mji wa Mbinga Dkt. Kung’e Nyamuryekung’e leo April 25, 2024 ameeleza haja ya kuongeza idadi ya shule zinazotumia unga ulioongezwa virutubishi.

Akizungumza wakati wa kikao cha kamati ya lishe ya Halmashauri ya Mji wa Mbinga (robo ya tatu ya mwaka wa fedha 2023/24), Dkt. Nyamuryekung’e alisema kwa sasa matumizi ya unga huo kwenye shule si wakuridhisha.

Ni kwa muktadha huo aliwaagiza maafisa elimu na maafisa lishe kushirikiana katika utoaji wa elimu kuhusu umuhimu wa kutumia unga ulioongezwa virutubishi.

“Wakazi wa Halmashauri ya Mji wa Mbinga wapewe elimu kuhusu uwepo wa mashine zinazoongeza virutubishi kwenye unga na umuhimu wa matumizi ya unga huo,” alisema Dkt. Nyamuryekung’e.

Aliongeza: “Matumizi ya unga ulioongezwa virutubishi ni muhimu sio kwa wanafunzi tuu, bali kwa jamii kwa ujumla.”

Afisa Lishe wa Halmashauri ya Mji wa Mbinga Bi. Gloria Maya alisema watashirikiana na idara ya Viwanda na Biashara ya Halmashauri pamoja na watendaji wa kata kuhakikisha wanafunzi na jamii kwa ujumla wanatumia unga ulioongezwa virutubishi.

“Tutashirikiana kuhamasisha wamiliki wa mashine za kuzalisha unga wafunge mashine za kuongeza virutubishi ili kutatua tatizo la upatikanaji wa unga huo,” alisema Bi. Gloria.

“Tuna imani kuwa matumizi ya unga ulioongezwa virutubishi utaongeza uelewa na ufaulu wa wanafunzi.”