KITUO CHA AFYA CHA MBANGAMAO KUNUFAISHA WAKAZI 53,219, KAMATI YA SIASA YA MKOA WA RUVUMA YATOA HEKO

Tarehe ya kuwekwa: October 13th, 2023

Na Alex Nelson Malanga

Afisa Habari----MTC

Mbinga.  Mradi wa kituo cha Afya cha Mbangamao katika Halmashauri ya Mji wa Mbinga (MTC) wenye thamani ya Shilingi milioni 500, unatarajiwa kunufaisha wakazi 53,219 wa kata tano za Mbangamao, Kagugu, Mpepai, Kikolo na Kilimani.

Mradi huu unahusisha ujenzi wa jengo la wazazi na chumba cha upasuaji, maabara, jengo la wagonjwa wa nje (OPD) na jengo la kufulia.

Mradi huo unaotarajiwa kukamilika Oktoba 30, 2023, siku ya Jumatano ya Oktoba 11, ulimwagiwa sifa kemkem na Kamati ya siasa ya Mkoa wa Ruvuma kwa kutekelezwa kwa viwango vya hali ya juu.      

Katibu wa Chama Cha Mapinduzi (CCM) Mkoa wa Ruvuma Mhe. Mohamed Ally Khalfani alisema uongozi wa Halmashauri chini ya mwenyekiti wake mahiri Mhe. Kelvin Mapunda na Mkurugenzi mchapakazi Bi. Amina Seif, unafanya kazi nzuri kusimamia mradi huo.

“Mmemtendea haki mama Samia (Rais Mhe. Dkt. Samia Suluhu Hassan) kwa kusimamia vizuri mradi huu wa Shilingi milioni 500. Tofauti na nyie, kuna maeneo mengine hawajatendea haki miradi,” alisema Mhe. Khalfani.

Sifa hazikuishia kwa Mwenyekiti na Mkurugenzi, bali zilikwenda mbali kwa Mganga Mkuu wa Halmashauri ya Mji wa Mbinga, Dkt Kung’e Nyamuryekung’e kwa kusimamia vizuri mradi.

“Mganga mkuu alijigeuza kuwa mhandisi---amesimamia vizuri na anaujua vizuri mradi, endelea kuchapa kazi,” Mhe. Khalfani alimmwagia sifa Dkt. Nyamuryekung’e.

Kwa upande wake Mkuu wa Wilaya ya Mbinga Bi. Aziza Mangosongo alisema Rais Samia ana kila sababu ya kupongezwa kutokana na kutoa pesa kwaajili ya utekelezaji wa miradi mbalimbali ya maendeleo.

Naye Mkurugenzi wa Halmashauri ya Mji wa Mbinga Bi. Amina aliishukuru serikali inayoongozwa na  Mhe. Rais Dkt. Samia, kwa kuipatia Halmashauri ya Mji wa Mbinga pesa kwaajili ya utekelezaji wa miradi mbalimbali.

“Mama Samia anatupenda sana na ndio maana anatupatia pesa kwaajili ya miradi. Kwa muktadha huo tunapaswa kushikamana katika harakati za kutekeleza ilani ya chama chetu,” alisema Bi. Amina.

Mbunge wa Jimbo la Mbinga Mjini Mhe. Jonas Mbunda aliihakikishia Kamati ya Siasa ya Mkoa kuwa miradi yote inayotekelezwa katika Halmashauri ya Mji wa Mbinga iko salama salimini.