MAADHIMSHO YA KICHAA CHA MBWA MKOA WA RUVUMA YAFANA

Tarehe ya kuwekwa: October 6th, 2023

Na  Erasto George

Mbinga. Maadhimisho ya siku ya kichaa cha mbwa duniani katika mkoa wa Ruvuma yalifanyika kimkoa Alhamis, Septemba 28, 2023 katika kijiji cha Mpepai, Wilaya ya Mbinga.    

Mgeni rasmi wa maadhimisho hayo yaliyoenda na kauli mbiu “Kichaa cha Mbwa Afya moja kwa pamoja” alikuwa Kaimu Afisa Tawala wa Wilaya ya Mbinga  Bw. Andrea Mhagama  kwa niaba ya mkuu wa Wilaya hiyo Bi. Aziza Mangosongo.

Bw. Mhagama alisema ugonjwa wa kichaa cha mbwa unawaathiri binadamu na wanyama, pia  hauna tiba lakini unakingwa kwa chanjo na  kuzingatia kanuni za ufugaji bora wa mbwa.

Kwa muktadha huo, aliongeza kuwa ni muhimu kuadhimisha siku hiyo kwa kutoa elimu kwa jamii kuhusu ugonjwa huo.

“Maafisa mifugo toeni elimu zaidi kuhusu ugonjwa huo wa kichaa cha mbwa na kutoa chanjo ili  kutokomeza ugonjwa huo,” alisisitiza Bw. Mhagama.

Aidha, aliwaagiza wananchi kuwatunza mbwa hao kama walivyoelekezwa ili kudhibiti ugonjwa huo kwa kuwa wasipofanya hivyo wataleta madhara kwa jamii.

"Ni jukumu letu sote kujilinda na kuelimisha jamii hasa watoto kujihadhari na kutoa taarifa kwenye ofisi za mtaa na za mifugo pale tunapowaona mbwa wanaotembea mitaani ili waweze kudhibitiwa," alisisitiza.

Mkuu wa idara ya Kilimo, Mifugo na Uvuvi katika Halmashauri ya Mji wa Mbinga Bw.Enock Ndunguru, ambaye alimwakilisha Mkurugenzi wa Halmashauri hiyo Bi. Amina Seif, alitoa wito kwa wamiliki wa mbwa kuhakikisha mbwa wao wanachanjwa.

Nae Afisa Mifugo na mratibu wa tiba na chanjo za mifugo Bw. Condrad Kawonga alieleza kwamba swala la kuchanja mbwa lipo kwa mujibu wa sheria ya mifugo ya mwaka 2003.

Bw. Kawonga aliongeza kuwa kinga ni bora kuliko tiba, hivyo kila mwananchi anayefuga mbwa azingatie chanjo ya kichaa cha mbwa kipindi chote cha uhai wake.

Alisema miongoni mwa dalili za mtu mwenye ugonjwa wa kichaa cha mbwa ni kupata homa kali, kuumwa kichwa na mwili, kuogopa maji ya kunywa au kuoga  na kubweka kama mbwa.