MADEREVA BODABODA KUSAIDIANA KATIKA SHIDA

Tarehe ya kuwekwa: October 6th, 2023

Na Erasto George , Elizabeth Newa & Rahma Mwaka

Mbinga. Umoja wa  madereva pikipiki wa Wilaya ya Mbinga umeadhimia kuweka utaratibu mzuri wa kuchangiana ili kusaidiana pale zinapowakumba changamoto mbalimbali katika kazi yao.

Madereva hao wamekubaliana kuchangia kiasi cha Shilingi 10,000 kwa kila kijiwe cha bodaboda kilichopo ndani ya Wilaya ya Mbinga.

Wilaya ya Mbinga ina jumla ya vijiwe 150 vya bodaboda, ambapo vijiwe 105 vipo Halmashauri ya Mji Mbinga na 45 Mbinga Vijijini.

Maadhimio hayo ya Umoja wa madereva pikipiki wenye wanachama wapatao 2,500, yalifikiwa wiki iliyopita (Septemba 26, 2023) katika mkutano uliofanyika ndani ya  Jumba la maendeleo lililopo katika Halmashauri ya Mji Mbinga.

Katika mkutano huo pia walikubaliana kila kijiwe kuchangia  Shilingi 5,000 kwa ajili ya kuiwezesha timu yao ya mpira wa miguu Bodaboda FC kushiriki ligi mbalimbali.

Hatua hii inafuatia hamasa waliyoipata baada ya kutwaa ubingwa wa Mangosongo Oparesheni Safisha Mji - Mbinga ing'ae, wiki chache zilizopita.

Mwenyekiti wa bodaboda  Wilaya ya Mbinga Bw. Kefasi Kamage alisema wamekutana kwa ajili ya kujadili mambo kadhaa ikiwemo maafa, michezo na elimu inayohusu usalama wao.

Bw. Kamage aliwasihi madereva kuweza kutekeleza maadhimio waliyokubalina katika mkutano huo na kudumisha umoja.

Mgeni rasmi katika mkutano huo alikuwa ni Kamanda wa upelelezi wa makosa ya jinai Wilaya ya Mbinga Afande Lugano Gwassa.

Afande Gwassa aliwasihi madereva kufuata kanuni na sheria za usalama barabarani ili kulinda usalama wao na wa abiria wanaowabeba.

Dereva pikipiki Hamis Said alisema kufanyika kwa mkutano kumemsaidia kujua zaidi sheria na kuchukua tahadhari katika kazi yake.

Hii ni baada ya kamanda wa polisi kuwaelekeza na kuwaonya kuhusu makosa ya uvunjaji wa sheria za barabarani.

Nae mwenyekiti wa bodaboda mtaa wa Mission, kata ya Mbinga Mjini B, Bw. Peter Turuka alisema katika kikao hicho ameguswa na mada ya kusaidiana katika maafa.

 “Kusaidiana kutatusaidia kudumisha umoja katika shida  tunazopata ikiwemo kuumia na kifo,” alihitimisha Bw. Turuka.