Mahindi sasa kuuzwa ndani na nje ya Nchi

Tarehe ya kuwekwa: May 16th, 2018

Serikali imefuta katazo la awali lililokuwa likizuia zao la Mahindi kuuzwa nje ya Nchi. Kauli hiyo imetolewa leo na Waziri mwenye dhamana katika kikao cha Bunge la bajeti  kinachoendelea Mjini Dodoma. Serikali imesema sasa hivi Mkulima anaweza kuuza Mazao yake popote pale nje ya Nchi baada ya kujiridhisha kuwepo kwa akiba ya kutosha ya chakula.

Awali wakichangia bajeti ya Kilimo Wabunge wengi walikuwa na shinikizo kwa Serikali iangalie namna ya kuwakomboa wakulima wa Mazao ya Mahindi kutokana na kuwa wamezalisha Tani nyingi kwa mwaka 2017/2018 na hakuna soko ndani ya Tanzania kwani bei ya mazao hayo imeporomoka sana ukilinganisha na gharama walizotumia katika uzalishaji na uwezo wa Serikali kunua mazao hayo kwa bei nzuri haukuwepo.

Mhe. Mbunge wa Jimbo la Mbinga Mjini Ndg. Sixtus Mapunda alianza kwa kusema Sekta ya kilimo ndio Sekta inayowaajiri Watanzania wengi zaidi ya asilimia 75 kuliko sekta zingine, pia ndio Sekta pekee inayohakikisha chakula  kinapatikana Nchini kwa asilimia 100. Pamoja na hayo yote  Wakulima katika sekta hii wamefikishwa sehemu wamekata tamaa kabisa hasa katika eneo la uzalishaji na bei ya mazao hayo. Kutokana na Hotuba ya Waziri kuonyesha uzalishaji wa Mahindi unakadiriwa kuwa tani Milioni nane (8) kwa mwaka 2018/2019 ikilinganishwa na mwaka 2017/2018 ilikuwa tani Milioni sita (6) hivyo kuwa na tofauti ya ongezeko la tani Milioni mbili (2) Mhe. Sixtus Mapunda aliiomba Serikali kutoa mchanganuo kuhusu mahindi kiasi gani yatatosha kwaajili ya chakula na yatakayozidi kutakuwa na mpango gani kwa soko la nje.

“...lakini sisi kule kwetu nenda ukaanzie Rukwa, Katavi, Iringa, Mbeya, Njombe na Ruvuma wote sisi katika ujumla wetu hatulimi mahindi tuu kama chakula, tunalima vilevile Mpunga unakubali, Viazi vinakubali, Ndizi zinakubali, Mihogo…lazima sehemu hii ya chakula iliyozidi Waziri uje na Mchanganuo…” Mhe. Sixtus Mapunda alisisitiza