MAKISIO YA MAPATO MJI MBINGA YAONGEZEKA KWA ASILIMIA 32

Tarehe ya kuwekwa: July 17th, 2024

Na Alex Nelson Malanga

Afisa Habari----Mji Mbinga

Mbinga.  Halmashauri ya Mji wa Mbinga imeongeza kwa asilimia 32 makisio ya mapato yake ya ndani kwa mwaka wa fedha 2024/25 ikilinganishwa na mwaka uliopita.

Kaimu Mkurugenzi wa Mji wa Mbinga Dkt. Kung’e Nyamuryekung’e alisema Jumatano (Julai 17) kuwa Halmashauri ya Mji wa Mbinga inatarajia kukusanya Sh3.3 bilioni mwaka huu wa fedha ikilinganishwa na Sh2.5 bilioni ya mwaka uliopita.

“Ongezeko la asilimia 32 limechagizwa na kuongezeka kwa wigo wa mapato. Tuna vyanzo vipya vya mapato ambavyo ni ushuru wa mabango, kodi ya majengo na pango la ardhi,” alisema Dkt. Nyamuryekung’e.

Alisema kati ya Sh3.3 bilioni inayotarajiwa kukusanywa mwaka huu wa fedha, mapato ya ndani yasiyolindwa ni Sh2.5 bilioni na mapato ya ndani lindwa ni Sh0.8 bilioni.

Makisio ya mwaka huu yanamaanisha kuwa ili Halmashauri iweze kufikia lengo la mwaka mzima, inapaswa kukusanya wastani wa Sh275 milioni kwa mwezi.

“Tutafanya kila liwezekanalo kuhakikisha tunafanya vizuri linapokuja suala la makusanyo ya mapato,” alisisitiza Dkt. Nyamuryekung’e.

Alisema miongoni mwa mikakati ambayo Halmashauri imejiwekea kuhakikisha inakusanya mapato ipasavyo ni kutoa elimu ya mlipa kodi ili wananchi waone umuhimu wa kulipa kodi kwa hiari.

Mikakati mingine ni kutoa motisha kwa timu ya wakusanya mapato na ushuru ili kuongeza morali yao, na kufanya mapitio ya kodi zilizopitwa na wakati ili ziendane na mazingira ya biashara ya sasa.

“Kama Mhe. Rais. Dkt. Samia Suluhu Hassan alivyoelekeza, tumedhamiria kuwa na mfumo mzuri wa kodi ili kuchochea biashara na uwekezaji na hivyo kupelekea makusanyo ya mapato mengi zaidi,” alisema Dkt. Nyamuryekung’e.

 Mwaka wa fedha uliopita, Mji Mbinga ilifikia kwa asilimia 100 lengo la kukusanya Sh2.5 bilioni kama mapato yake ya ndani, shukrani kwa timu imara ya mapato na utayari wa wananchi kulipa kodi.

Vyanzo vyenye mchango mkubwa kwenye mapato ya ndani yasiyolindwa ni ushuru wa mahindi, ushuru wa kahawa, leseni za biashara, kodi ya pango,ushuru wa huduma, mauzo ya viwanja, ushuru wa maharage na ushuru wa maegesho ya magari.