MAMBO TISA KUTAWALA SIKU YA WAZEE DUNIANI KATIKA HALMASHAURI YA MJI WA MBINGA

Tarehe ya kuwekwa: September 25th, 2023

Na Rahma Mwaka, Elizabeth

Newa & Erasto George

Mbinga. Kamati ya maandalizi ya maadhimisho ya siku ya wazee duniani ya Halmashauri ya Mji Mbinga imesema mambo tisa yatafanyika kuelekea, na wakati wa maadhimisho ya siku hiyo itakayofanyika Oktoba 1 mwaka huu.      

Mambo hayo ni kutoa huduma za afya yakiwemo matibabu, vipimo na elimu lishe kwa wazee, kutoa msaada wa kisaikolojia na kijamii kwa wazee na wananchi wenye uhitaji na kuelimisha jamii kuhusu  masuala ya maadili na ukatili, kwa mujibu wa Afisa Ustawi wa Halmahauri ya Mji wa Mbinga Bw. Lucas Muhina.

Pia, Bw. Muhina aliyekuwa anaongea wakati wa kikao cha kwanza cha maandalizi wiki iliyopita aliongeza kuwa kamati itaandaa mabanda ya maonyesho kuhusu huduma za ustawi kwa wazee na kutoa elimu kuhusu huduma za ustawi wa jamii hususani kwa wazee katika vyombo vya habari na mikutano.

“Sanjari na hayo, wadau watajadili namna bora ya kutatua changamoto za wazee, kudhibiti mmomonyoko wa maadili na ukatili wa kijinsia, na kupata shuhuda za vitendo vya ukatili dhidi ya wazee vilivyowahi kutokea katika maeneo mbalimbali,” alisema Bw. Muhina.  

Pia siku hiyo inatarajiwa kupambwa na michezo mbalimbali itakayowahusisha wazee ikiwemo kukimbia, kuvuta kamba, kukimbiza kuku na kucheza muziki.

Na mwisho wa siku, maafisa ustawi watawatunuku vyeti vya utambuzi wazee waliofanya vizuri katika jamii kama ilivyoagizwa na ofisi ya Katibu Tawala wa Mkoa.

Kikao cha kwanza cha maandalizi ya siku ya wazee kiliongozwa na mwenyekiti Lusiana Ndunguru na katibu Bw. Paul Mbawala ambaye ni mkuu wa huduma za Ustawi wa mji wa Mbinga.

Kikao hicho kilichofanyika katika ukumbi wa mikutano wa Oddo Mwisho kilihudhuriwa na Afisa Utamaduni wa Halmashauri ya Mji wa Mbinga, maafisa ustawi kutoka Wilaya ya Mbinga  na wajumbe 5 waliowawakilisha wazee.