MAPATO YA NDANI MBINGA MJI YAFIKIA ASILIMIA 77

Tarehe ya kuwekwa: June 3rd, 2024

Na Alex Nelson Malanga

Afisa Habari---Mbinga Mji

Mbinga. Katika kipindi cha miezi tisa ya mwanzo ya mwaka wa fedha 2023/24, makusanyo ya mapato ya ndani ya Halmashauri ya Mji wa Mbinga yalifikia asilimia 77 ya lengo la mwaka mzima.

Mkurugenzi wa Halmashauri hiyo Bi. Amina Seif alisema mwishoni mwa wiki jana kuwa hadi kufikia tarehe 31/3/2024 tayari walikuwa wamekusanya shilingi bilioni 1.908 ikilinganishwa na lengo la mwaka mzima la shilingi bilioni 2.476.

Hii inamaanisha kuwa Halmashauri hiyo ilikuwa inakusanya wastani wa shilingi milioni 212 kwa mwezi ikilinganishwa na wastani wa shilingi milioni 206.3, kiasi ambacho ilitakiwa kukusanya ili kufikia lengo la mwaka mzima.

Tafsiri ya takwimu hizi ni kuwa Halmashauri ya Mji wa Mbinga haina mlima wa kupanda kukusanya kiasi cha shilingi milioni 568 kilichobakia kufikia lengo la mwaka mzima.

Kwanini haina mlima wa kupanda? Jibu ni kwasababu inapaswa kukusanya wastani wa shilingi milioni 189.3 kwa kila mwezi (Aprili-Juni), kiasi ambacho ni kidogo ikilinganishwa na kile cha miezi tisa ya mwanzo.

Miezi tisa ya mwanzo Halmashauri hiyo ilikuwa  inakusanya shilingi milioni 5.7 zaidi ikilinganishwa na shilingi milioni 206.3 iliyopaswa kukusanya kwa mwezi ili kufikia lengo la mwaka mzima.

“Tunakwenda vizuri. Naamini tutafikia lengo la makusanyo ya mwaka huu wa fedha wa 2023/24,” alisema Bi. Amina wakati wa kikao cha Baraza la Madiwani robo ya tatu (Januari-Machi, 2024).

Akiongea wakati wa kikao hicho kilichofanyika katika ukumbi wa mikutano wa Oddo Mwisho uliopo katika Halmashauri hiyo, Bi. Amina aliongeza: “Naamini jitihada zetu katika ukusanyaji wa mapato zitazaa matunda.”

Kwa Halmashauri ya Mji wa Mbinga, vyanzo vyenye mchango mkubwa kwenye mapato ya ndani halisi ni ushuru wa mahindi, ushuru wa kahawa, leseni za biashara, kodi ya pango,ushuru wa huduma, mauzo ya viwanja na ushuru wa maharage.