MATOKEO YA SENSA CHACHU YA MAENDELEO

Tarehe ya kuwekwa: April 18th, 2024

Na Alex Nelson Malanga

Afisa Habari---Mbinga Mji

Mbinga.  Halmashauri ya Mji wa Mbinga imedhamiria kutumia sensa ya watu na makazi ya 2022 katika kuratibu mipango ya maendeleo kisayansi na hivyo kusogeza huduma za kijamii karibu zaidi kwa wananchi.

 Hayo yalisemwa Aprili 16, 2024 na viongozi mbalimbali wa Wilaya ya Mbinga wakati wa mafunzo ya matumizi ya matokeo ya sensa ya watu na makazi ya mwaka 2022 kwa viongozi, watendaji, makundi na wadau mbalimbali.

Akifungua mafunzo hayo yaliyotolewa na maofisa kutoka Ofisi ya Taifa ya Takwimu (NBS), Mkuu wa Wilaya ya Mbinga Mhe. Kisare Matiku Makori aliwataka viongozi katika ngazi mbalimbali wilayani kwake kutumia takwimu za sensa katika kupanga mipango mbalimbali ya maendeleo.

“Hizi takwimu tusizione kama mapambo….tuzitumie katika kupanga mipango ya maendeleo ya watu wetu ili wanufaike na rasilimali za nchi hii kama Mhe. Rais Dkt. Samia Suluhu Hassan alivyojidhatiti kipindi anaingia madarakani mwaka 2021,” alisema.

Akiwapatia chakula cha ubongo washiriki wa mafunzo, mtaalamu kutoka NBS Dkt. Mwinyi Mwinyi alisema kwa mujibu wa sensa ya mwaka 2022, Halmashauri ya Mji wa Mbinga ina jumla ya watu 158,896.

Kati ya watu hao, alielezea, wa jinsi ya kike ni 83,014 na wakiume ni 75,882.

Katika kata 19 za Halmashauri ya Mji wa Mbinga, Mpepai ndiyo inaongoza kwa kuwa na watu wengi zaidi ambao ni 17,072 na Mbinga Mjini B ndiyo yenye watu wachache zaidi, 3,160.

Makamu Mwenyekiti wa Halmashauri ya Mji wa Mbinga Mhe. Alex Andoya alisema: “Tutatumia takwimu hizi katika kutekeleza miradi ya maendeleo na kwa kufanya hivyo miradi hii italeta tija kubwa kwa wananchi wetu”

Mhe. Andoya ambaye pia ni diwani wa kata ya Kilimani, aliungwa mkono na Mbunge wa Mbinga Mjini Mhe. Jonas Mbunda.

Mhe. Mbunda alisema kabla ya kupeleka mradi wa maendeleo eneo husika ni lazima idadi ya watu ifahamike kwa lengo la kuleta tija kwa jamii.

Alikwenda mbali zaidi na kusema kuwa kupitia matokeo ya sensa ya 2022, Halmashauri ya Mji wa Mbinga itaweza kuainisha maeneo mapya ya biashara na vyanzo vipya vya mapato.

Alihitimisha kwa kusema: “Sensa ina umuhimu kwa kila kitu tunachotaka kufanya kwenye jamii.”