MBINGA MJI KUMI BORA MASHINDANO YA USAFI

Tarehe ya kuwekwa: May 20th, 2024

Na Alex Nelson Malanga

Afisa Habari----Mbinga Mji

Mbinga. Wakazi wa Halmashauri ya Mji wa Mbinga, mkoani Ruvuma wana kila sababu ya kutabasamu kufuatia Halmashauri yao kuwepo kwenye 10 bora ya mashindano ya Afya na Usafi wa Mazingira kwa ngazi ya miji.

Kwa mujibu wa mashindano hayo yanayoratibiwa na Wizara ya Afya, Halmashauri ya Mji wa Mbinga kwa mwaka 2023 ilishika nafasi ya tisa kati ya Halmashauri za miji 21 zilizoshindanishwa.

Katika nafasi hiyo, Mbinga Mji ilifungana na Halmashauri za miji ya Mbulu, Mkoa wa Manyara na Nanyamba, mkoa wa Mtwara baada ya kupata asilimia 62 ya alama zote.

Tafsiri yake ni kuwa Halmashauri ya Mji wa Mbinga ilizizidi kete Halmashauri za miji 10 na kuzidiwa na Halmashauri za miji nane.

Pamoja na asilimia zilizopata kwenye mabano, Halmashauri zilizozidiwa na ile ya Mbinga Mji ni Kasulu (56), Geita (56), Newala (56), Handeni (52), Ifakara (52), Tarime (46), Korogwe (46), Bunda (45), Bariadi (44) na Kondoa (30).

 Kwa upande mwingine, Halmshauri hiyo ilizidiwa na Halmashauri za miji ya, pamoja na asilimia zao kwenye mabano, Njombe (89), Babati (73), Makambako (72), Nzega (71), Kibaha (70), Masasi (67), Mafinga (66) na Tunduma (64).

 Akizungumza ofisini kwake siku ya Jumatatu, Mei 20, 2024 Mkurugenzi wa Halmashauri ya Mji wa Mbinga Bi. Amina Seif aliwamwagia sifa wakazi wa Mbinga Mji pamoja na wadau wengine kwa jitihada zao za kulivaa jukumu la usafi wa mazingira yao.

 “Tuko hapa kwasababu ya jitihada ya kila mmoja wetu. Tuendelee kufanya usafi bila kuchoka ili mwaka huu tufanye vizuri zaidi,” alisema Bi. Amina.

Afisa Afya wa Halmashauri ya Mji wa Mbinga Bw. Felix Matembo alisema mafanikio waliyoyapata ni chachu kwa Mbinga Mji kufanya vizuri zaidi katika mashindano ya mwaka 2024.

Alisema ni shauku yake kuona Halmashauri ya Mji wa Mbinga inatinga katika tatu bora kwenye mashindano ya mwaka huu.

“Nitahakikisha naratibu wakazi wa Mbinga Mji pamoja na wadau wengine ili tushike nafasi tatu za juu katika mashindano ya mwaka huu wa 2024,” alisema Bw. Matembo.