MBINGA MJI YADHAMIRIA KUTOKOMEZA UDUMAVU

Tarehe ya kuwekwa: May 29th, 2024

Na Alex Nelson Malanga

Afisa Habari----Mbinga Mji

Mbinga. Halmashauri ya Mji wa Mbinga imeishukuru serikali ya Jamhuri ya Muungano wa Tanzania chini ya uongozi wa mheshimiwa Rais Dkt. Samia Suluhu Hassan kwa kuwa mstari wa mbele katika mapambano dhidi ya lishe duni na tatizo la udumavu.

Mkurugenzi wa Halmashauri ya Mji wa Mbinga Bi. Amina Seif Mei 29, 2024, alisema Serikali ya awamu ya sita imerahisisha upatikanaji wa vibao vya kupimia urefu watoto chini ya miaka mitano ili kurahisisha ufuatiliaji wa maendeleo ya ukuaji wa watoto hao.

 Katika juhudi za kutokomeza udumavu kwa watoto, Halmashauri ya Mji wa Mbinga imetumia kiasi cha shilingi milioni 3.5 kama mapato ya ndani kununua vibao 14 vya kupimia urefu watoto katika vituo vya kutolea huduma za afya.

Bi. Amina alisema hapo awali kulikuwa na vibao 15 tu vya kupimia urefu katika vituo 25 vinavyotoa huduma ya mama na mtoto katika Halmashauri ya Mji wa Mbinga.

Hivyo Ununuzi wa vibao vingine 14 vinavyopelekwa kwenye vituo vya afya vya Myangayanga, Luhehe, Masimeli, Mkwaya, St. Martin Depores, Kikolo, Ruvuma Chini, Tukuzi, Umati na St. Gabriel, utapelekea vituo vyote 25 kuwa na vibao.

Uwepo wa vibao hivyo utasaidia watoto watakaokuwa wanapata huduma za kliniki katika vituo vyote vya afya vinavyotoa huduma ya mama na mtoto katika Halmashauri ya Mji wa Mbinga kupimwa urefu kila baada ya miezi mitatu kama muongozo unavyoelekeza.

“Hii itasaidia kubaini watoto ambao wapo kwenye hatari ya kudumaa na hivyo kuwafuatilia kwa ukaribu na pia kuwapatia wazazi wao ushauri wa ulishaji bora ili kupunguza tatizo la udumavu,” alisema Bi. Amina katika ofisi za Halmashauri ya Mji wa Mbinga.