‎MBINGA MJI YAFANYA TATHIMINI YA UTOAJI HUDUMA ZA AFYA

Tarehe ya kuwekwa: August 1st, 2025

‎
‎Mbinga.  Kaimu Mkurugenzi wa Halmashauri ya Mji wa Mbinga, Dkt. Kung'e  Nyamuryekung’e, ameongoza kikao kazi cha waganga wafawidhi na waganga viongozi wa Halmashauri hiyo.
‎
‎Akisoma hotuba kwa niaba ya Mkurugenzi wa Halmashauri ya Mji wa Mbinga Bi. Amina Seif, amewapongeza kwa kazi nzuri wanayoifanya katika vituo vyao vya kazi katika kuhakikisha wananchi wanapata huduma bora.
‎
‎Amebainisha kuwa kikao hicho ni mahususi kwaajili ya kujadili hali ya utoaji wa huduma za afya katika vituo hivyo, kubadilishana uzoefu na kuweka mikakati  madhubuti kuboresha huduma kwa wananchi.
‎
‎“Jukumu lenu kubwa ni kuhakikisha maagizo, miongozo na sera kutoka ngazi ya Taifa, Mkoa na Halmashauri zinatekelezwa kikamilifu," alisema Dkt. Kung'e.
‎
‎Ameongeza kuwa kwa maeneo ambayo vituo havifanyi vizuri  hatarajii kuona hali hiyo ikiendelea, hivyo ni lazima waweke mikakati  madhubuti ya kuboresha huduma, kuongeza uwajibikaji kwa kufuatilia kwa karibu utekelezaji wa majukumu ya kila siku.
‎
‎Pia, Dkt. Kung'e  amevipongeza vituo vya huduma za afya vinavyofanya vizuri kwa juhudi zao na uwajibikaji, lakini mafanikio hayo yasiwafanye kulegea, akiwataka kuendelea kusimamia  weledi, uadilifu na ufuatiliaji wa karibu wa vituo vyao ili kuwa mfano wa kuigwa.
‎
‎Ametoa maagizo kwa timu ya usimamizi wa huduma za afya na Waganga wa Vituo, na kumtaka kila mratibu ahakikishe anasimamia ipasavyo shughuli zote zilizopo chini ya programu yake, matumizi ya GotHomis kwenye vituo vya afya, kukusanya mapato kwa uadilifu na  kufanya kazi kwa waledi.