Mdaka: TUWEKEZE KATIKA KUZUIA UKATILI WA KIJINSIA

Tarehe ya kuwekwa: December 11th, 2023

Na Alex Nelson Malanga

Afisa Habari----MTC

Mbinga.  Mwenyekiti wa CCM, Wilaya ya Mbinga Bw. Joseph Augustino Mdaka amewataka wakazi wa wilaya hiyo kuwekeza zaidi katika kuzuia vitendo vya ukatili dhidi ya wanawake na watoto.

Alitoa wito huo jana (Disemba 10, 2023) wakati wa maadhimisho ya kilele cha siku 16 za kupinga ukatili wa kijinsia yaliyofanyika katika kijiji cha Mzuzu, Kata ya Kitura.

 “Wanawake na watoto ni kundi linalopitia changamoto zaidi za ukatili wa kijinsia kutokana na uwepo wa mila na desturi kandamizi,” alisema Bw. Mdaka wakati wa maadhimisho yaliyokwenda kwa kauli mbiu: Wekeza kuzuia ukatili wa kijinsia.

Aliwapongeza wadau wote wanaoshughulika na kuibua vitendo vya ukatili kwani jitihada zao zinasaidia sana kubaini na kupunguza vitendo vya kikatili katika jamii.

Aidha, alisema suala la kushughulikia ukatili wa kijinsia ni jukumu la kila mmoja.

“Kila mmoja wetu awe balozi kwa nafasi yake,” alisema Bw. Mdaka.

Uwepo wa vitendo vya ukatili, alisema, umekuwa na athari kubwa katika kujenga mahusiano mema katika jamii na hivyo kupelekea kuporomoka kwa maadili na kushuka kwa uchumi katika kaya na jamii kwa ujumla.

Aliongeza kuwa jamii imeshuhudia kukua kwa utegemezi kwenye familia na ongezeko la watoto wa mitaani waliopoteza matumaini na upendo kutoka kwa wazazi wao.

Matokeo ya uwepo wa kizazi hiki ni kutengeneza kundi la wezi na ‘panyarodi’ ambao wanafanya jamii kuishi kwa mashaka.

Alitoa rai kwa viongozi katika ngazi ya vijiji, mitaa na kata kutoa ushirikiano mkubwa katika kuhakikisha vitendo vya ukatili wa kijinsia vinafichuliwa na kuripotiwa katika vyombo vya sheria.

“Mkitakiwa kutoa ushahidi, hamna budi kutoa ushirikiano wa kutosha,” alisema.

Mkurugenzi wa Halmashauri ya Mji wa Mbinga Bi. Amina Seif alitoa msisitizo kwa wanajamii kuibua na kufichua matukio yote ya ukatili wa kijinsia yanayoendelea kuanzia katika ngazi ya familia.

Mkurugenzi wa Halmashauri ya Wilaya ya Mbinga Bw. Juma Haji Juma alielezea haja ya kutengeneze mazingira ya upendo kwenye familia ili kuepukana na vitendo vya kikatili ambavyo vinakwamisha maendeleo katika jamii.  

Siku 16 za kupinga ukatili wa kijinsia ni kampeni  ya kimataifa ya kupinga ukatili  dhidi ya wanawake.

 Kampeni hii hufanyika kuanzia Novemba 25 na kumalizika Disemba 10  ya kila mwaka kwa ajili ya kupinga ukatili na kutetea haki za wanawake.