MDAKA: VIJANA ENZINI MUUNGANO

Tarehe ya kuwekwa: April 26th, 2024

Na Alex Nelson Malanga

Afisa Habari---Mbinga Mji

Mbinga. Mwenyekiti wa Chama cha Mapinduzi (CCM) Wilaya ya Mbinga Bw. Joseph Mdaka ametoa rai kwa vijana kuuenzi Muungano wa Tanganyika na Zanzibar kwa kuepuka kusikiliza taarifa za upotoshaji.

Akitoa rai hiyo wakati wa maadhimisho ya miaka 60 ya Muungano wa Tanganyika na Zanzibar leo Aprili 26, 2024, Bw. Mdaka aliwataka vijana waepuke taarifa hizo za upotoshaji kutoka kwa watu au vikundi vya watu.

“Ni vema vijana wakaisoma vizuri historia ya nchi yao na hasa kuhusu Muungano ili wafahamu chimbuko la mafanikio ya tunu hii muhimu katika Taifa letu,” alisema katika sherehe zilizofanyika katika ukumbi wa shule ya sekondari Makita iliyopo katika Halmashauri ya Mji wa Mbinga.

Aliwataka waliokuwepo wakati wa Muungano waendelee kuwarithisha vijana tunu zote zinazopatikana katika Muungano ambao umekuwa ukiimarika siku hadi siku.

“Ni wajibu wetu kuwarithisha vijana wetu tunu hii muhimu ili tutaendelea kushikamana zaidi na zaidi,” alisema Bw. Mdaka.

Aliongeza: “Muungano wetu ni kielelezo tosha cha mshikamano na umoja madhubuti ulio baina ya pande mbili za Jamhuri ya Muungano wa Tanzania.”

Aidha, aliendelea kusema, Muungano wa Tanganyika na Zanzibar ni kielelezo cha upendo, amani, utulivu na undugu ndani na nje ya bara la Afrika.

Kuendelea kuwepo kwa Muungano huu ni jitihada za viongozi wa pande mbili na wananchi wake katika kuhakikisha unadumishwa.

Hili, alifafanua, limewezekana kwa kuzipatia ufumbuzi kero zote zinazoonesha kutaka kudhoofisha umoja  huu wa kihistoria duniani, alisema Bw. Mdaka.

Alisema kutokana na Muungano huu, wananchi wa pande zote mbili wamefaidika katika nyanja mbalimbali za kiuchumi, kisiasa, kijamii na hata kiutamaduni.

Kila Aprili 26 ya kila mwaka watanzania wanaadhimisha siku ya muungano wa Tanganyika na Zanzibar ulioasisiwa na Hayati Mwalimu Julius Kambarage Nyerere na  Hayati Sheikh Abeid Amani Karume.