MHE MAKORI: LAZIMA TUTATUE KERO ZA WANANCHI

Tarehe ya kuwekwa: July 31st, 2024

Na Alex Nelson Malanga

Afisa Habari----Mji Mbinga

Mbinga. Mkuu wa Wilaya ya Mbinga Mhe. Kisare Matiku Makori Jumatano (Julai 31) aliwataka viongozi wa Halmashauri ya Mji wa Mbinga kujikita katika kusikiliza na kutatua kero za wananchi.

Alitoa wito huo alipokuwa akiongea na wananchi wa kata ya Matarawe mara baada ya kutembelea shule ya Sekondari Dkt. Philip Mpango na Shule ya Msingi Matengo zilizopo katika kata hiyo.

“Lazima tujikite katika kushughulikia changamoto na kero mbalimbali za wananchi na kuhakikisha hakuna mwananchi anaonewa,” alisema Mhe. Makori.

Aliwataka wananchi wakiwa na changamoto wasisite kupaza sauti kwa kuwashirikisha viongozi wa Halmashauri katika maeneo yao na kwamba wasiporidhika wanaruhusiwa kwenda ngazi za juu.

“Uzuri serikali yetu ina muundo mzuri kuanzia ngazi ya chini---mtaa, kitongoji, kata, Halmashauri, Wilaya, Mkoa na kuendelea,” alisema Mhe. Makori.

“Ukiona kiongozi wa ngazi moja hana msaada, nenda ngazi ya juu.”

“Tusikae tunanung’unika, kama kuna jambo haliko sawa, ni vema tukafahamishana kwasababu hayo ndio matamanio ya Mhe Rais Dkt. Samia Suluhu Hassan.”

Mara nyingi Mhe. Rais amekuwa akiwasisitizia wasaidizi wake kuhusu haja ya kusikiliza na kutatua kero za wananchi na kwamba kwa ambaye hawezi akae pembeni kupisha wanao weza.

Mhe. Rais amenukuliwa mara kadhaa katika hotuba zake akisema katika uongozi wake hatapenda kuongoza serikali inayonyanyasa au kuonea wananchi.

Kwa upande wake Mwenyekiti wa Halmashauri ya Mji wa Mbinga Mhe. Kelvin Mapunda alisema wako tayari kuhakikisha wana wasikiliza wananchi na kutatua changamoto wanazokumbana nazo.

“Nitashirikiana na wataalamu wa Halmashauri kuhakikisha wananchi wanapewa huduma bora na wanafurahia serikali yao,” alisema huku akiahidi kutomuangusha Mhe. Rais katika hilo.